Гавань настаўніцтва
Заўтра ў навучэнцаў Лоеўскага дзяржаўнага педагагічнага каледжа з’явіцца абноўка. А калі дакладней, невялікая, але знакавая дэталь упрыгожыць вучэбную форму юнакоў і дзяўчат. Гэта зялёны шоўкавы шалічак — своеасаблівая адзнака, распрацаваная да 50-гадовага юбілею каледжа.
За паўвека гісторыі тут падрыхтавалі і выпусцілі 5993 спецыялістаў. Дарэчы, сярод цяперашніх 52 выкладчыкаў 15 — выпускнікі ўстановы, у тым ліку і дырэктар Раіса Каляда, якая скончыла тагачаснае педвучылішча ў 1982 годзе. Потым яна вучылася на гістарычным факультэце ГДУ імя Ф. Скарыны. Раіса Васільеўна пачынала выкладчыкам, 8 гадоў была намеснікам дырэктара па вучэбнай рабоце і ўжо пяць гадоў узначальвае калектыў.
Працуюць тут таленавітыя педагогі, якія дабіваюцца дзейсных вынікаў у працы. Сярэдні бал паспяховасці — 7,8. Работы навучэнцаў занялі ў 2012 годзе першае месца на рэспубліканскай выставе дэкаратыўна-прыкладной творчасці. У каледжа першае месца ў вобласці па забеспячэнні якасці адукацыі сярод ССНУ. А яшчэ ў рабят трэцяе месца ў рэспубліканскіх спаборніцтвах па летнім мнагабор’і сярод вытворча-тэхнічных вучылішчаў і сярэдніх спецыяльных навучальных устаноў. Ёсць шмат іншых перамог.
Дасягненням у розных накірунках спрыяюць вучэбна-метадычная і матэрыяльна-тэхнічная базы. У каледжы тры інтэрактыўныя дошкі, дзве мультымедыйныя ўстаноўкі, сучасны камп’ютарны клас. А яшчэ ў кожным кабінеце ёсць медыятэкі, што дазваляе рэалізоўваць у поўнай ступені патрабаванні адукацыйнага стандарту па спецыяльнасці “Пачатковая адукацыя”. Ствараецца кабінет інфармацыйных тэхналогій.
Напярэдадні юбілею ў каледжы шмат яркіх мерапрыемстваў: адкрылася фотавыстава па старонках гісторыі ўстановы, прайшла акцыя “Яны ў нашай памяці”, адбываюцца сустрэчы з ветэранамі педагагічнай працы. І па даўняй завядзёнцы праведзены велазабег на ўзбярэжжа Дняпра ў вёсцы Крупейкі, дзе ў кастрычніку 1943 года ішло фарсіраванне Дняпра.
Сярод навучэнцаў шмат адметных талентаў, таму прайшлі конкурсы эстраднай песні, рытмічнага танца, чытальнікаў аўтарскіх твораў, прэзентацыя відэаролікаў, прысвечаных роднаму каледжу. На свята завітае шмат гасцей.