Слова маё, будзь святым, як Айчына
Дні беларускага пісьменства распачынаюцца сёння ў Шчучыне на Гродзеншчыне. 22-е па ліку свята будзе як і заўсёды яркім і запамінальным.
Сёння ў горадзе адчыніцца пасля капітальнага рамонту цэнтральная раённая бібліятэка імя Цёткі. З удзелам айчынных і замежных пісьменнікаў адбудзецца круглы стол “Сугучча: літаратурны працэс і інфармацыйнае грамадства”. Пройдзе навукова-практычная канферэнцыя “Шчучынскія чытанні — 2015”, а таксама конкурс чытальнікаў. Першы дзень фестывалю завершыцца спектаклем Рэспубліканскага тэатра беларускай драматургіі.
Заўтрашні дзень распачнец- ца пасадкай саду малітвы каля храма Святога Міхаіла архангела, хрэсным ходам да храма Богаяўлення і літургіяй у храме. Адной з галоўных падзей свята стане ўручэнне I Нацыянальнай літаратурнай прэміі, уладальнікамі якой стануць 7 пісьменнікаў. На плошчы Свабоды адбудзецца фестываль кнігі і прэсы, можна будзе азнаёміцца з экспазіцыяй плакатаў-пераможцаў міжна- роднага конкурсу патрыятычнага плаката моладзі краін СНД “Нам дарагі мір”.
70-годдзю Вялікай Перамогі савецкага народа над фашызмам прысвячаецца кніжная выстава “Памяць аб вайне нам кніга пакідае”, на якой можна будзе ўбачыць унікальныя выданні перыяду Вялікай Айчыннай з фондаў Нацыянальнай бібліятэкі Беларусі.
У праграме свята таксама перасовачныя выставы дзяржаўных літаратурных музеяў Я. Купалы і Я. Коласа, выставачны праект да 160-годдзя з дня смерці Адама Міцкевіча, а таксама прысвечаны жыццю і творчасці Уладзіміра Караткевіча.
Заўтра ў свяце возьмуць удзел прадстаўнікі Гомельшчыны.
Т. ВІКТАРАВА