Калі нешта атрымалася, адпраўляешся ў палёт
Мастацкі кіраўнік Нацыянальнага акадэмічнага народнага хору імя Цітовіча Міхаіл Дрынеўскі перад канцэртам у Гомелі “расшыфраваў” дзесяць слоў, лёсавызначальных для яго творчасці.
Музыка і захапленне
— Адзін з першых цёплых успамінаў звязаны з Палацам культуры чыгуначнікаў. У 1959 годзе, калі яшчэ вучыўся на першым курсе Гомельскага музычнага вучылішча, выпадкова апынуўся на выступленні маскоўскага хору Сакалова. І калі ён заспяваў, ад захаплення ажно слёзы выступілі.
Талент і амбіцыі
— Людзі ў нашым калектыве таленавітыя і ведаюць сабе цану. Ёсць працавітыя і якія вельмі лёгка ўключаюцца ў мастацтва і дасягаюць вялікіх вяршынь. Дарэчы, ваша зямлячка з Буда-Кашалёўскага раёна Валянціна Крыловіч у мінулым годзе атрымала званне народнай артысткі. Прычым не заканчвала музычных універсітэтаў, яна самародак з непаўторным голасам. І да ўсяго гэтага вельмі вынослівая: нават не ведае, што такое хвароба.
Аўтэнтыка і відовішча
— Мы аўтэнтыкі многа не даём — людзям патрэбны відовішчы. З самага пачатку я хацеў, каб хор спяваў акапэльна. Ва ўсім свеце такое выкананне — найвышэйшы пілатаж для хору. Ганаруся, што мы маем у рэпертуары царкоўную музыку. У былым Саюзе толькі два народных калектыва браліся за яе, у тым ліку і мы. І з гэтымі песнямі перамагалі ў міжнародных конкурсах.
Сілы і радасць
— Сілы ідуць з дзяцінства, палескай закалкі. А яшчэ ад ажыццяўлення таго, што ты задумаў зрабіць, і калі гэта атрымалася, адчуваеш сябе па-іншаму. І энергія бярэцца, і палёт, і хочацца далей нешта ствараць. Душа перапаўняецца радасцю, вось, напрыклад, калі апрацоўку ўдалую зробіш, той жа “Шумеў камыш”. З гэтай песні нам удалося зрабіць, як кажуць, паэму кахання.
Дысцыпліна і цярплівасць
— Я люблю дысцыпліну. А каб спраўляцца, трэба яшчэ і цярплівасць мець. Але гэта не адразу можа атрымацца, не за адзін год. Бывае, што чалавек аступіўся, але трэба працаваць і дапамагаць, таму што часам з такіх вырастаюць годныя спевакі, музыканты, танцоры.