Наш Іван Пятровіч

96 гадоў таму назад на Гомельшчыне ў сялянскай сям’і нарадзіўся Іван Шамякін.

Дзяцінства пісьменніка звязана з Добрушскім і Гомельскім раёнамі. А 1936 — 1940 гады ў час вучобы ў Гомелі, у тэхнікуме будаўнічых матэрыялаў, будучы класік нацыянальнай літаратуры дэбютаваў у літаб’яднанні пры “Гомельскай праўдзе”. І пачынаў з вершаў.

Удзельнік Вялікай Айчыннай вайны, Іван Шамякін адлюстроўваў перажытую народам трагедыю, прапусціўшы яе праз уласнае сэрца. Яго героі — з народа, яго сюжэты зачэрпнуты з рэальнага жыцця.

Два пасляваенных гады Іван Пятровіч настаўнічаў у вёсцы Пракопаўка Гомельскага раёна, а ў 1946-м паступіў на завочнае аддзяленне Гомельскага педагагічнага інстытута імя Чкалава. Ён ніколі не парываў сувязяў з малой радзімай. Любіў працаваць на дачы ў Церусе. Заўжды цікавіўся творчасцю пісьменнікаў-землякоў, па-добраму рабіў заўвагі пачынаючым.

Архіў “Гомельскай праўды”, якая сёлета адзначае сваё 100-годдзе, утрымлівае багата публікацый, звязаных з імем будучага народнага пісьменніка Беларусі. Цікава, напрыклад, у нумары за 4 верасня 1949 года прачытаць інфармацыю “Пісьменнік Іван Шамякін у Гомелі”. У ёй паведамляецца: “У адным з апошніх пасяджэнняў літаратурнага аб’яднання пры рэдакцыі газеты “Гомельская праўда” прыняў удзел член праўлення Саюза савецкіх пісьменнікаў БССР, былы выхаванец Гомельскага літаб’яднання, малады беларускі празаік Іван Шамякін. Пісьменнік Іван Шамякін выступіў перад членамі літаб’яднання з дакладам на тэму “Вынікі II з’езда пісьменнікаў Беларусі і задачы літаб’яднання”.

Іван Пятровіч не парываў сувязяў з “Гомельскай праўдай” і надалей. Многія старонкі апавяданняў, раманаў, аповесцей выносіў на суд землякоў са старонак абласной газеты.

Герой Сацыялістычнай Працы, акадэмік Нацыянальнай акадэміі навук Беларусі, дэпутат Вярхоўнага Савета СССР Шамякін адным з першых дзяржаўных дзеячаў прыехаў у пацярпелыя ад Чарнобыльскай катастрофы раёны, каб падтрымаць землякоў у той няпросты час. Убачанае, перажытае стала асновай яго рамана “Злая зорка”, аповесці “Палеская мадонна”. А колькі роздумаў выклікалі ў чытачоў яго зборнікі аповесцей “Драма”, “Падзенне”, “Сатанінскі тур”, “Пошукі прытулку”, дзённікавыя запісы апошніх гадоў, у якіх пісьменнік застаецца верным сваёй самай галоўнай тэме: пошуку чалавечага ў чалавеку.