Смута, жуда пасеяна чорнай бядой...

Прэзентацыя кнігі “Песні пакінутых вёсак”, прысвечанай этнакультурным традыцыям шэрагу раёнаў Гомельшчыны, якія пацярпелі пасля чарнобыльскай катастрофы, адбылася ў Мінску.

Больш за 300 адзінак матэрыяльных помнікаў, сабраных падчас экспедыцый навукоўцаў на Гомельшчыну, прадстаўлена ў выданні, якое падрыхтавана сумесна з Цэнтрам даследаванняў беларускай культуры, мовы і літаратуры Нацыянальнай акадэміі навук Беларусі. Укладальнікі — доктар філалагічных навук Таццяна Валодзіна і кандыдат філалагічных навук Наталля Мазурына. Выданне выйшла ў свет пад агульнай рэдакцыяй доктара гістарычных навук, доктара архітэктуры, прафесара, акадэміка Аляксандра Лакоткі.

Песенная спадчына запісана і сабрана ў розныя часы задоўга да чарнобыльскай катастрофы ў вёсках Брагінскага, Ельскага, Нараўлянскага, Хойніцкага раёнаў, вёсках, якія цяпер не існуюць.

У прэзентацыі бралі ўдзел прадстаўнікі Міністэрства інфармацыі Рэспублікі Беларусь, Нацыянальнага сходу Рэспублікі Беларусь, Нацыянальнай акадэміі навук Беларусі. Адзначалася, што гэта выданне — каштоўнейшы матэрыял для гісторыкаў, мовазнаўцаў, этнографаў, прафесійных і самадзейных мастацкіх калектываў і, безумоўна, для перасяленцаў з пацярпелых раёнаў, раскіданых воляй лёсу па ўсёй Беларусі.

Зборнік з’яўляецца пераможцам Нацыянальнага конкурсу “Мастацтва кнігі — 2017” у намінацыі “За ўклад у захаванне духоўнай спадчыны”.

Нагадаем некалькі песень, запісаных ад нашых землякоў: Дзякуй богу, вясна прыйшла, Скаціна ў поле пайшла: Кароўка — каля дуброўкі, А конікі — каля межачкі, А гусачкі — каля лужачкі, А свіначкі — каля нівачкі. Дзякуй богу, вясна прыйшла, Людзям радасць і рабоцейку

прынясла: Баліць галоўка ў гаспадынькі, Як там у лузе скацінкі, Як зямельку хутчэй заараць. А ў дзеўкі галоўка не баліць, Бо з мілёнкам да ночы стаіць. Дзякуй богу, вясна прыйшла. Запісана ў вёсцы Сялец

Брагінскага раёна ад Кацярыны Коцур. Да кавала зязюлечка, Да ў саду на памосце. Э-эй, кавала зязюлечка ў саду

на памосце. Прыехалі да дзевачкі Тры казакі ў госці. Э-эй, прыехалі да дзевачкі Тры казакі ў госці. Запісана прафесарам Галінай Барташэвіч у 1981 годзе ў вёсцы Рашаў Хойніцкага раёна ад Серафімы Якіменка. А ў нашага пана Двор гаражоны. Святы вечар! Двор гаражоны Да ўсё рожамі... Запісана ў вёсцы Млынок Ельскага раёна ад Улляны Яраш. Заручаеш мяне, мамко, заручаеш, Ой, чаму ж ты суседочак не пытаеш: Ці добрая та свякруха, ці ліхая, Ці ўгаджу я той свякрусе, маладая... Запісаў Іван Крук у вёсцы Дзёрнавічы Нараўлянскага раёна. Падрыхтавала Т. ВІКТАРАВА