І ў рэспубліцы ў ліку лепшых

У аператыўнай зводцы Буда-Кашалёўскага раёна па вытворчасці малака камунальнае сельскагаспадарчае ўнітарнае прадпрыемства “Губічы” трывала займае першае месца, хаця некалі і было адстаючым.

А зараз сярэдні надой малака ад каровы тут перавышае 21 кілаграм, што больш, чым было ў адпаведныя дні летась. Асобныя аператары машыннага даення кароў надойваюць яшчэ больш. Дарэчы, па выніках мінулага года работнікі ферм сельгаспрадпрыемства займаюць не толькі лідзіруючыя месцы на Гомельшчыне, а і знаходзяцца ў ліку лепшых у рэспубліцы. Па надоях малака ад каровы яны ўваходзяць у першую сотню гаспадарак рэспублікі. У Губічах надой ад каровы летась склаў 6908 кілаграмаў малака. Сёлета тут маюць намер значна пераўзысці і сямітысячны рубеж.

Дырэктар КСУП Міхаіл Рыбік зазначае, што магчымасці для гэтага ёсць. У гаспадарцы працуюць вопытныя кваліфікаваныя жывёлаводы, пастаянна ўдасканальваецца арганізацыя іх работы. Уводзяцца новыя сучасныя тэхналогіі кармлення і ўтрымання дойнага статка, які пастаянна абнаўляецца за кошт высокапрадуктыўных першацёлак сваёй гадоўлі. Важна адзначыць і той факт, што на фермах створаны належныя ўмовы для работы, быту і адпачынку людзей. Пастаянна падводзяцца вынікі спаборніцтва жывёлаводаў. Перадавікі заахвочваюцца маральна і матэрыяльна. С. ДАРОЖНЫ