Песня даруе крылы
У Лельчыцах прайшоў VI рэгіянальны фестываль песеннага мастацтва “Гэты дзіўны спеў з глыбінь народных” на прыз мастацкага кіраўніка Нацыянальнага акадэмічнага народнага хору Рэспублікі Беларусь імя Г. Цітовіча, народнага артыста Рэспублікі Беларусь, прафе
Адкрыццё фестывалю адбылося на гарадской плошчы. “Менавіта ў той мясцовасці, дзе гучалі песні народныя, нарадзіўся цудоўны чалавек — Міхаіл Дрынеўскі, — зазначыў старшыня раённага выканаўчага камітэта Анатолій Гапонік. — Песня — здабытак народа, і яе патрэбна берагчы, перадаваць з пакалення ў пакаленне. Жыццё песні — гэта жыццё народа. А фестываль — вялікае народнае свята, значная падзея ў культурным жыцці Лельчыцкага краю, цудоўны падарунак да Дня горада”.
Сам жа маэстра Міхаіл Дрынеўскі з хваляваннем дадаў: “Дзякуй вам, мае землякі, спевакі і спявачкі, за тыя добрыя словы, ад якіх можна і пачырванець. Дзякуй, што ў такі сонечны дзень пакінулі агароды, адарваліся ад бульбы і далучыліся да народнай песні, да высокага мастацтва. Песня дае жыццё, даруе крылы на розныя добрыя дзеянні і справы. Песня павінна быць у душы”.
Пасля урачыстага шэсця па вуліцы Савецкай дэлегацыі накіраваліся да раённага цэнтра культуры і народнай творчасці, дзе і адбылася конкурсная праграма. Сваё выканаўчае майстэрства прадэманстравалі 24 творчыя калектывы і 14 асобных выканаўцаў з Петрыкаўскага, Жыткавіцкага, Нараўлянскага, Мазырскага, Ельскага, Хойніцкага, Лоеўскага і Лельчыцкага раёнаў.
Кульмінацыйным момантам свята стала выступленне Нацыянальнага акадэмічнага народнага хору Рэспублікі Беларусь імя Г. Цітовіча. Гэта быў для усіх цудоўны падарунак да Дня горада.
Тым часам журы вызначыла дыпламантаў і пераможцаў конкурсу. Прыз сімпатыі гледачоў атрымаў народны ансамбль “Вясёлка” Нараўлянскага раённага дома культуры. У намінацыі “За далучэнне да шматвекавых традыцый народнай мастацкай творчасці” лепшым прызнаны Міхаіл Акуліч (Тонежскі сельскі дом культуры Лельчыцкага раёна). У розных намінацыях дыплома І ступені ўдастоены Марыя Карась (Тонежскі СДК) і дуэт у складзе Галіны Хросцік і Святланы Дваракоўскай (Лельчыцкі раённы цэнтр культуры і народнай творчасці), народны вакальны ансамбль “Вербніца” Лельчыцкага раённага цэнтра культуры і народнай творчасці, народны фальклорны ансамбль “Дубравіца” Рычоўскага цэнтра традыцыйнай культуры Жыткавіцкага раёна. А званне лаўрэата фестывалю “Гэты дзіўны спеў з глыбінь народных” аднагалосна прысуджана народнаму фальклорнаму калектыву “Танежанка” Тонежскага сельскага дома культуры.