Як спявае “Зараніца”, у танцы хочацца кружыцца
Галасістае наша Палессе! Калі вам надарыцца прыехаць у Лельчыцы і трапіць на выступленне народнага хору работнікаў культуры “Зараніца”, адчуеце асалоду, пераканаецеся, якой жыццядзейнай сілай падмацаваліся з крыніц гэтага непаўторнага краю. Шматгалосныя, з элементамі падгаласавой поліфаніі беларускія народныя песні “Ой, ты грушка” ў апрацоўцы Міхася Дрынеўскага, а таксама “Пакаціўся туман” і “Ой, рана сонейка зайграла” ў апрацоўцы Мікалая Сіраты ў рэпертуары гэтага калектыву не проста радуюць слых, яны дэманструюць шырокі спектр творчага таленту ўдзельнікаў.
Спяваюць у хоры 23 жанчыны і 9 мужчын, яны дасканала валодаюць спевамі з падводкай, падгалоскамі, характэрнымі для глыбінных народных твораў. Акампанемент ансамбля народных інструментаў — баян, цымбалы, скрыпка, домра, кантрабас — ствараюць непаўторны музычны фон.
Сёлета ў “Зараніцы” юбілей — 15-годдзе. Увесь гэты час кіруе хорам Уладзімір Ляўкоўскі, выпускнік Магілёўскага вучылішча культуры па спецыяльнасці “харавая музыка”, чалавек, шчыра ўлюбёны ў сваю справу.
Народны хор работнікаў культуры “Зараніца” актыўна ўдзельнічае ў рэгіянальных, абласных і рэспубліканскіх святах, аглядахконкурсах і фестывалях, адзначаны дыпломамі самага рознага ўзроўню. У 2014 годзе лельчукі атрымалі Гран-пры абласнога фестывалю харавога мастацтва імя Таццяны Лапацінай у Рэчыцы. А як хораша выступілі сёлета ў райцэнтры Мядзел на Міншчыне! Там на ўзбярэжжы возера Мястра, на рэспубліканскім фестывалі харавога мастацтва “Пеўчае поле”, “Зараніцы” ўручаны дыплом лаўрэата першай ступені. І вось чарговая перамога: калектыў стаў лаўрэатам прэміі Беларускага прафсаюза работнікаў культуры, інфармацыі, спорту і турызму ў сферы культуры і мастацтва (намінацыя “Народная творчасць”).
Спявай, “Зараніца”, радуй слухачоў!