Шчаслівай дарогі ў прафесію
Дзень маладога рабочага правялі ў ААТ “Камінтэрн”.
Свята “Прысвячэнне ў рабочыя” прайшло ў форме гульні-квэста.
— Важна, каб вы ўсвядомілі значнасць абранай прафесіі, адчулі суладнасць каманднай працы, ад якой залежыць канчатковы вынік, — звярнулася да моладзі старшыня абкама прафсаюза работнікаў лёгкай прамысловасці Жанна Міхаленка.
Маладыя швачкі, размеркаваныя на каманды, атрымалі маршрутныя лісты, дружна рушылі ў вандроўку. Па меры руху па фабрыцы знаходзілі пункты прызначэння, адказвалі на няпростыя пытанні, а за правільны адказ атрымлівалі сцяжок з сімволікай прадпрыемства.
Падарожжа-іспыт завяршылася ў дэманстрацыйнай зале, дзе маладым рабочым паказалі фільм пра фабрыку. Урачыстасць адкрыў генеральны дырэктар “Камінтэрна” Пётр Афончанка, які пажадаў быць дапытлівымі, імкнуцца стаць прафесіяналамі.
У сваю чаргу, маладыя швачкі падзяліліся першымі ўражаннямі аб працы, падзякавалі за магчымасць паўдзельнічаць у цікавым квэсце, пазнаёміцца з прадпрыемствам, з якім звязваюць будучыню.
Пасля творчага ўзаемаабмену ў фармаце круглага стала мерапрыемства завяршылася ўшанаваннем усіх маладых рабочых, пераможцаў квэсту, а таксама лепшых супрацоўнікаў, якія пераступілі парог фабрыкі ў 2016 і ўжо сталі сапраўднымі майстрамі. Яны — добры прыклад для пераймання. Моладзь атрымала падарункі ад прафкама. Мікалай ІГНАТОВІЧ