Прывітанне табе, маладосць!
Сустрэча з вядомымі таленавітымі выпускнікамі прайшла ў Гомельскім дзяржаўным універсітэце імя Францыска Скарыны.
Па запрашэнню кафедры беларускай літаратуры сабраліся вучоныя, пісьменнікі, журналісты, аўтары-выканаўцы, каб праз шмат гадоў акунуцца ў атмасферу ўласнай маладосці, згадаць сваіх выкладчыкаў, сказаць прывітальнае слова цяперашнім студэнтам. Вялікая кніжная выстава “Нашчадкі Скарыны”, на якой пачэснае месца занялі творы выпускніка ВНУ, народнага пісьменніка Беларусі Івана Шамякіна, нагадала ўсім пра вечнасць сапраўднага Слова.
Шчыра прывітала гасцей і студэнтаў дэкан філалагічнага факультэта Алена Палуян, яна падкрэсліла адказнасць вучыцца ва ўніверсітэце, які носіць імя першадрукара зямлі беларускай. А потым была рэтраспектыва славутых імёнаў выпускнікоў-літаратараў, сярод якіх і тыя, хто злажыў свае галовы на Вялікай Айчыннай — Леанід Гаўрылаў, Мікола Сурначоў, а таксама тыя, хто ўславіў альма-матэр у 50-я, 60-я, 70-я, 80-я гады мінулага стагоддзя. Свае вершы чыталі і дарылі ўласныя кнігі Ніна Шклярава, Святаслаў Крупенька, Алена Асенчык, Сяргей Краснабарод і іншыя. Гучалі і творы паэтаў у выкананні студэнтаў-першакурснікаў, і расповеды навукоўцаў пра даследчыцкую дзейнасць кафедры беларускай літаратуры, якую ўзначальвае доктар філалагічных навук, прафесар Іван Штэйнер.
Яркім момантам сустрэчы стала выступленне першага чэмпіёна Алімпійскіх гульняў па грэблі на байдарках і каноэ Леаніда Гейштара, яго аповед пра шлях да зорнай вышыні. Славуты выпускнік падарыў літаратурна-мастацкаму музею філалагічнага факультэта свае аўтабіяграфічныя кнігі. А настаўнік фізікі і астраноміі, вялікі знаўца касмічнай тэмы Уладзімір Ларыёнаў натхнёна згадаў пра свае першыя крокі да зорнага неба.