Чалавечыя стасункі класіка
У абласной універсальнай бібліятэцы імя Леніна ў Год малой радзімы прэзентавалі мемарыяльную залу, прысвечаную народнаму пісьменніку Беларусі Андрэю Макаёнку.
Экспазіцыя памяці знакамітага драматурга, ураджэнца вёскі Борхаў Рагачоўскага раёна, была адкрыта раней, з удзелам жонкі пісьменніка Любові Іванаўны, пасынка Юрыя. Родныя тады дзякавалі калектыву абласной бібліятэкі, пісьменнікам Гомельшчыны, якія ўпэўнілі радню, што макаёнкаўская спадчына павінна быць у Гомелі. А дакументаў, фотаздымкаў, рукапісаў Любоў Іванаўна перадала столькі, што яны даюць шырокае ўяўленне пра жыццёвы і творчы шлях пісьменніка, яго чалавечыя стасункі.
Упэўнена, што зробленае калектывам бібліятэкі, улюбёным у справу, не пакіне раўнадушным нікога з наведвальнікаў. Мастацкае афармленне, стылізаваная тэатральная сцэна, з якой разам з героямі-акцёрамі спектакляў Андрэй Ягоравіч быццам пазірае на нас, сённяшніх, стварае эфект прысутнасці Макаёнка, творы якога ставіліся ў 300 тэатрах СССР. Прынамсі, у мемарыяльнай зале прадстаўлены ліст, датаваны яшчэ 1954 годам, з паведамленнем, што яго п’еса “Камяні ў пячонцы” пастаўлена Дзяржаўным драмтэатрам Літоўскай ССР і аўтара запрашаюць на прэм’еру. Пра папулярнасць драматургіі Макаёнка сведчыць і такі факт: спектакль па п’есе “Зацюканы апостал” на падмостках Маскоўскага тэатра сатыры ставіўся на працягу 15 гадоў!
У адной з вітрын — узнагароды ўдзельніка Вялікай Айчыннай вайны Андрэя Макаёнка. Кранаюць сэрца яго дзённікі таго скрушнага часу, калі зусім яшчэ малады чалавек пісаў па-руску: “И снова светящиеся струи, несущие смерть и ужас, заставляют лечь. Вопли, возвещающие смерть, и непроглядная темень кажутся адом. Кажется, сама земля стонет и
взывает к пощаде. Неумолимая смерть безжалостно уродует, издевается, скрипит зубами. Каким хрупким кажется человек...”
У прэзентацыі мемарыяльнай залы ўдзельнічалі дырэктар абласной бібліятэкі імя Леніна Марына Рафеева, доктар філалагічных навук, прафесар, загадчык кафедры беларускай літаратуры ГДУ імя Ф. Скарыны Іван Штэйнер, прадстаўнікі творчай інтэлігенцыі Гомеля.
Багата пашчыраваў на ўвасабленне сваёй ідэі калектыў краязнаўчага аддзела бібліятэкі, мастак Генадзь Фядотаў, намеснік дырэктара музея палацавапаркавага ансамбля Уладзімір Літвінаў. Усё зроблена з цудоўным мастацкім густам, так, што па-сапраўднаму адчуваеш маштаб асобы Макаёнка.
Шчырая ўдзячнасць усім, хто прычыніўся да гэтай справы сваім сэрцам.