Як дбаеш, так і маеш
Так разважае старэйшы кіраўнік вобласці, заслужаны работнік сельскай гаспадаркі Рэспублікі Беларусь Рыгор Купрыянавіч Шпакаў, які ўзначальвае сельскагаспадарчы вытворчы кааператыў “50 год Кастрычніка” Рэчыцкага раёна амаль паўстагоддзя.
Дзякуючы калектыўнай эфектыўнай працы, прымяненню інтэнсіўных тэхналогій, вяскоўцы пастаянна дабіваюцца высокіх вытворча-эканамічных паказчыкаў па ўсіх напрамках сельскагаспадарчай дзейнасці. Асабліва добрыя вынікі ў жывёлагадоўлі. Тут і летам, і зімой высокія надоі малака і прыбаўленне ў вазе маладняку буйной рагатай жывёлы на адкорме. На адзінку зямельнай плошчы вытворчасць малака бадай што лепшая ў рэспубліцы. Высокая і прадуктыўнасць дойнага статка.
Летась сярэдні надой ад каровы склаў каля васьмі тысяч кілаграмаў малака. Ды і сёлета, дзякуючы належнаму кармленню і ўтрыманню жывёлы, штодзённа ў сярэднім ад каровы надойваецца прыкладна 22 кілаграмы малака, што амаль на паўтара кілаграма больш, чым у адпаведныя дні летась. У выніку кожны дзень дзяржаве прадаецца 32 тоны малака. Плюс у параўнанні з адпаведнымі леташнімі днямі даходзіць да дзвюх тон. І якасць прадукцыі высокая. Больш за 60% яе — экстра. Выручку атрымліваюць і ад рэалізацыі іншай прадукцыі сельскай гаспадаркі, у тым ліку мяса і цялушак на ўзнаўленне дойнага пагалоўя.
Варта адзначыць, што ў апошні час у СВК “50 год Кастрычніка” актывізуюцца работы па падрыхтоўцы да веснавой пасяўной кампаніі.