Начыталі на смартфоны
У Гомелі прайшоў рэгіянальны фінал рэспубліканскага конкурсу юных чытальнікаў “Чытаем па-беларуску з velcom”.
Сацыяльна-адукацыйны праект праводзіцца кампаніяй velcom пры падтрымцы Міністэрства адукацыі Беларусі. Яго мэта — адкрыць для вучняў свет беларускай літаратуры па-новаму, а таксама выкарыстаць магчымасці сацыяльных сетак для адукацыі.
На працягу двух з паловай месяцаў удзельнікі конкурсу, вучні 7-х і 8-х класаў з усёй Беларусі, запісвалі відэа, на якіх яны чытаюць творы са школьнай праграмы па беларускай літаратуры. На конкурс даслалі 2048 відэа агульнай працягласцю больш за 45 гадзін. У сацыяльных сетках гэтыя ролікі набралі ўжо больш за 700 000 праглядаў.
У рэгіянальны фінал выйшлі 30 лепшых чытальнікаў з Гомеля і Гомельскай вобласці. Яны атрымалі магчымасць прачытаць адзін з твораў беларускай літаратуры перад гледачамі — мерапрыемства прайшло ў СШ № 11 Гомеля. Журы, у складзе якога пісьменнік, галоўны рэдактар дзіцячага часопіса “Вясёлка” Уладзімір Ліпскі, акцёр і тэлевядучы Юрый Жыгамонт, засталося пад вялікім уражаннем ад майстэрства чытальнікаў.
— Я рэдка калі кажу, больш маўчу, але вось тут душа мая не вытрымала. Сёння быў паўнавартасны канцэрт: выдатнейшыя нумары, выдатнейшыя чытальнікі. І шкада, што нельга вызначыць у Гомельскай вобласці дзесяць замест пяці пераможцаў, — адзначыў Юрый Жыгамонт.
Пяць лепшых чытачоў узнагародзілі смартфонамі. Гэта Аляксандра Ларчанка, Аляксандра Рудэнка, Ірына Шыкалава, Уладзімір Мішчук і Павел Саснок. Яны паўдзельнічаюць у рэспубліканскім фінале праекта, які адбудзецца ў маі.