Ёсць школа на планеце адораных дзяцей
Такімі словамі пачынаецца гімн сярэдняй школы № 14 г. Мазыра, якая ў гэтым годзе адзначыла сваё 25-годдзе.
На апошняе дзесяцігоддзе прыпадае час асаблівага росквіту. У многім таму, што гэты час школу ўзначальвае Алена Прыбышчук — чалавек высокай адказнасці, пастаяннага творчага пошуку, шырокай эрудыцыі і нястомнай энергіі.
Ад поспехаў у школе да поспехаў у жыцці — гэта крэда нашага педагагічнага калектыву. Дзейнасць школы паспяховая ва ўсіх накірунках, аднак найлепшыя вынікі ў алімпіядным руху. Самае масштабнае і папулярнае інтэлектуальнае спаборніцтва вучняў — рэспубліканская алімпіяда, штогод яна праводзіцца па 16 вучэбных прадметах. Намеснік дырэктара па вучэбнай рабоце Ала Кондзік курыруе алімпіядны рух у школе. Яна адзначае, што падрыхтоўка да ўдзелу ў рэспубліканскай алімпіядзе ідзе на працягу ўсяго навучальнага года. Знайсці свайго вучня, зацікавіць прадметам, займацца ім на паглыбленным узроўні — гэта толькі першыя крокі. Не спыняцца на дасягнутым, не адчайвацца, калі не адразу ўсё атрымліваецца, не перагарэць і не стаміцца раней часу — гэта ўжо пазней.
На другім этапе алімпіяды сёлета вучні СШ № 14 атрымалі 56 дыпломаў — на 9 больш, чым у мінулым годзе. Школа трэці год запар з’яўляецца бясспрэчным лідарам сярод усіх навучальных устаноў Мазыршчыны. А яшчэ вельмі прыемна, што вучні паспяхова выступаюць амаль па ўсіх вучэбных прадметах, з 16 прадметаў дыпломы атрыманы па 14.
Ёсць у школе настаўнікі, чые дасягненні найбольш значныя, і поспехі вызначаюцца ўжо не гадамі, а дзесяцігоддзямі. Гэта настаўнікі хіміі Наталля Кравец і беларускай мовы — Ларыса Краўчанка. Абедзве працуюць у школе з дня яе адкрыцця, абедзве ўлюбёныя ў свой прадмет і заўсёды гатовы ісці наперад. Вучань Наталлі Віктараўны Аляксей Флярко тройчы быў удзельнікам заключнага этапа рэспубліканскай алімпіяды па хіміі. Юнак не проста захапляецца хіміяй, з ёй збіраецца звязаць будучую прафесію. Цяжка пералічыць супрацоўнікаў Мазырскага НПЗ і ўрачоў гарбальніцы — былых вучняў Наталлі Кравец. Асаблівы гонар — выпускніца 2014 года, студэнтка БДУ Анастасія Жанжэўская. Двойчы дзяўчына перамагала на заключным этапе рэспубліканскай алімпіяды, і на хімічны факультэт БДУ была залічана без уступных іспытаў.
Ларыса Краўчанка — чалавек, шчыра ўлюбёны ў спеўнае беларускае слова. Высокі прафесіяналізм, любоў да дзяцей, штодзённая самааддача на ўроку — яе педагагічны почырк. Вольга Клышко, Ганна Дубавец, Марыя Альхімовіч, Марыя Афанасьева, Вікторыя Семяніцкая пад кіраўніцтвам Ларысы Іванаўны ў розныя гады паспяхова выступалі на заключным этапе алімпіяды. У гэтым навучальным годзе Вікторыя Семяніцкая стала ўладальніцай дыплома III ступені на заключным этапе. Усе былыя выхаванцы Ларысы Іванаўны паспяховыя ў сваёй прафесійнай дзейнасці, быць лепшымі становіцца іх жыццёвым правілам.