Вёска Прудок і яе насельнікі
Прэм’ера спектакля прайшла раней, у маі, на сцэне Нацыянальнага акадэмічнага тэатра імя Янкі Купалы. Пастаноўка створана пры падтрымцы Міністэрства культуры Беларусі, а генеральным партнёрам выступіла кампанія velcom. Эксперыментальны паказ меў поспех, і спектакль уключылі ў пастаянны рэпертуар тэатра.
І вось купалаўцы прыехалі з пастаноўкай да калінкавічан. Адна з найбольш яркіх прэм’ер сезона была прадэманстравана ў 20 кіламетрах ад вёскі Прудок, малой радзімы аўтара — Андруся Горвата, якую ён зрабіў знакамітай і дзякуючы якой стаў вядомы сам.
Калінкавічы — горад для герояў кнігі Горвата знакавы: менавіта адсюль пачынаецца для прудкоўцаў “цывілізацыя”, тут жыве шматлікая радня аўтара “Радзіва”. Ганаровымі гасцямі калінкавіцкай прэм’еры “Радзіва Прудок” сталі героі кнігі — простыя прудкоўцы.
Андрусь Горват пакінуў сталіцу, пераехаў у дзедаву хату ў Прудок, абжыўся, пісаў дзённік, які потым стаў кнігай. Па кнізе малады рэжысёр Раман Падаляка і паставіў спектакль. На сцэне ён раскрыў галоўную ідэю — пошукі маладым чалавекам, незадаволеным сабой і ўласным жыццём, свайго сапраўднага “я”. Акцёры Міхаіл Зуй, Дзмітрый Есяневіч і Святлана Анікей паказалі майстэрскае пераўвасабленне, стварыўшы выдатныя вобразы палешукоў — людзей простых, шчырых, добрых, крыху наіўных. Такіх застаецца ўсё менш. Знікае паступова блізкі і зразумелы аўтару ў дзяцінстве вясковы быт. Аб гэтым, а таксама аб ранейшых чыстых і шчырых пачуццях — настальгія ў кнізе і на сцэне.
Перад паказам акцёрскі і аўтарскі калектыў завітаў у Мазыр на сустрэчу з прадстаўнікамі СМІ, якая праходзіла ў культурніцкай прасторы “Даліна анёлаў”.
— Сённяшні паказ для нас — стваральнікаў спектакля, акцёраў, якія ў ім граюць, — быў не менш хвалюючай падзеяй, чым прэм’ера: нам належала прадставіць вобразы прудкоўцаў перад іх рэальнымі прататыпамі. Кніга і наш спектакль паводле яе вельмі шчырыя і сапраўдныя — такія ж, як людзі, пра якіх пісаў Андрусь, як іх жыццё і думкі, — адзначыў на сустрэчы Раман Падаляка.
Кіраўнік групы па карпаратыўнай сацыяльнай адказнасці кампаніі velcom Віктар Пазнякоў адзначыў, што для іх кампаніі спектакль “Радзіва Прудок” — не проста адзін з шэрагу цікавых культурных праектаў. Гэта вельмі блізкая гісторыя, якая пачалася яшчэ ў 2017 годзе з прэзентацыі кнігі Андруся Горвата ў праекце MOVABOX. У студзені 2018 года на фестывалі мабільнага кіно velcom Smartfilm быў адзначаны фільм “Ягор”, які паводле “Радзіва Прудок” таксама зняў Раман Падаляка. Кампанія з радасцю дапамагла і Купалаўскаму тэатру стварыць спектакль, які стаў адметнай падзеяй у тэатральным жыцці.