Як паром з раёна прышвартаваўся на музейным форуме
На нядаўнім музейным форуме ў Брэсце лоеўскі Музей бітвы за Днепр адзначаны дыпломам першай ступені.
Музейны форум — сапраўды вышэйшы прафесійны конкурс музейшчыкаў нашай краіны, які праходзіць раз на некалькі гадоў. Сёлета, ужо ў чацвёрты раз, ён прайшоў у Брэсце, у рамках святкавання 1000-годдзя горада над Бугам.
І было асабліва прыемна, што ў самай прэстыжнай намінацыі — “За лепшае прадстаўленне музея на экспазіцыі форуму” — перамог менавіта лоеўскі Музей бітвы за Днепр. Узнагароду і грамату першай ступені наш раённы музей атрымаў за праект “Дняпроўскі музейны кластар”, арганізаваны сумесна з Брагінскім гістарычным музеем, з карціннай галерэяй, Рэчыцкім краязнаўчым музеем, Хойніцкім раённым краязнаўчым музеем і грамадскім аб’яднаннем “Беларускі зялёны крыж”.
У аснову экспазіцыйнага праекта была пакладзена адна са знакавых падзей у жыцці беларускіх музеяў апошніх некалькіх гадоў — міжнародны праект “Ад партнёрства мясцовых музеяў да шырокага трансгранічнага культурнага супрацоўніцтва”, які прайшоў у 2018 годзе. Праўда, больш вядомы ён стаў пад сваёй неафіцыйнай назвай “Дняпроўскі паром”, мэтай якога было аб’яднанне музеяў Гомельшчыны і Чарнігаўскай вобласці ў адзіны музейны кластар на грунце стварэння трансгранічнага музейна-турыстычнага маршруту.
Рэалізацыя праекта падштурхнула і развіццё іншых ініцыятыў па ўзаемадзеянні паміж музейнымі ўстановамі для наладжвання сувязяў і стварэння мясцовых міжмузейных культурных цэнтраў, пляцовак і кластараў з мэтай павышэння іх сацыяльнага і сацыяльна-культурнага патэнцыялу, наладжвання трывалых камунікацыйных каналаў для здзяйснення супольных праектаў, папулярызацыі сваёй дзейнасці і прыцягнення мясцовай супольнасці ў музейнае жыццё. Адным з такіх праектаў на базе “Дняпроўскага парома” і стаў “Дняпроўскі музейны кластар”.