Пошук Аміны
Чым адметныя назвы вуліц гарпасёлка з боку мовазнаўства, ці ёсць у іх лінгвістычныя асаблівасці? Гэтай цікавай тэме была прысвечана работа навучэнкі Акцябрскай раённай гімназіі Аміны Назаравай. Не так даўно дзяўчына прыняла ўдзел у абласной навукова-практычнай канферэнцыі “Пошук”, па выніках якой стала переможцам і ўладальнікам дыплома трэцяй ступені.
Конкурс даследчых работ праводзіцца не першы год. Аміна і яе настаўніца Таццяна Крэч яшчэ ў мінулым навучальным годзе вырашылі, што прымуць удзел у гэтай дастаткова складанай канферэнцыі.
— Паколькі зараз Год малой радзімы, то тэму работы хацелі звязаць менавіта з Акцябрскім. І прыйшла ідэя напісаць пра вуліцы, а дакладней, зрабіць лінгвістычны аналіз назваў вуліц нашага гарпасёлка, — расказвае Таццяна Сяргееўна. — Работа Аміны называлася “Лiнгвiстычны аналiз назваў вулiц гарадскога пасёлка Акцябрскi”.
— Мы даведаліся, што такое тапаніміка — навука, якая вывучае геаграфічныя назвы, іх паходжанне, сэнсавае значэнне, развіццё, сучасны стан, напісанне і вымаўленне, а таксама гаданіміка — назвы лінейных аб’ектаў у горадзе, у тым ліку праспектаў, вуліц, завулкаў, праездаў, бульвараў, — удакладняе Аміна. — Нас зацікавілі вуліцы, якія названы ў гонар знакамітых людзей. Даведаліся пра Ціхана Бумажкова, Фёдара Паўлоўскага і іншых дзеячаў. Таксама я правяла апытанне сярод вучняў гімназіі, ці ведаюць яны назвы вуліц нашага гарпасёлка.
Непасрэдна на канферэнцыі, дзе прысутнічалі навукоўцы, моваведы, выкладчыкі Гомельскага дзяржаўнага ўніверсітэта імя Францыска Скарыны, Аміна павінна была абараніць сваю работу: расказаць яе змест і адказаць на пытанні. Напрыклад, ці ёсць нешта незвычайнае ў назвах вуліц Акцябрскага, калі выбрана такая
тэма. Аміна адказала, што якраз незвычайных назваў і няма, таму практычная значнасць работы ў тым, каб зацікавіць гэтай тэмай грамадскасць.
Трэба дадаць, што да абароны сваіх работ і публічнага выступлення былі дапушчаны ўсяго 10 вучняў з усёй вобласці. Пяць рабят адзначаны дыпломамі. Яны будуць прымаць удзел у аналагічнай навукова-практычнай канферэнцыі рэспубліканскага ўзроўню. Як кажуць Аміна і Таццяна Сяргееўна, зараз жа ў іх іншыя мэты: рыхтавацца да алімпіяды па беларускай мове і літаратуры.
Нагадаем, што ў мінулым годзе Аміна стала ўладальнікам дыплома ІІІ ступені на заключным этапе рэспубліканскай алімпіяды па вучэбных прадметах.