Няхай жа не зачэпіць іх «карона»!

Гэты ліст мы атрымалі з Петрыкава. Напісала нам 83-гадовая Ніна Ачапоўская, ветэран аховы здароўя.

«Я не літаратар, медсястра па адукацыі. Але ж па жыцці аптыміст, – падзялілася жанчына. – Люблю чытаць, цікаўлюся, што пішуць газеты. Пастаянная падпісчыца раёнкі «Петрыкаўскія навіны», пастаянна купляю і «Гомельскую праўду». Дзякуючы вам адчуваю сябе ў курсе жыцця. Раней і сама больш пісала, прынамсі, дзялілася, як пяцігадовай заспела Вялікую Айчынную вайну, як тата ў 1942-м, пасля ўцёкаў з варожага палону, пайшоў у партызаны і да ліпеня 1944-га змагаўся з акупантамі ў атрадзе Глебава. Мне з матуляй давялося ў той час жыць у партызанскай зоне. А гэта зімовы лес, балоты, бясконцыя варожыя блакады, калі захопнікі палявалі на людзей з сабакамі. Цудам удалося нам пазбегнуць гібелі ў лагеры палонных жанчын і дзяцей у вёсцы Клясаў. Хаця ён і быў часовым, нам хапіла. Не лічуся вязнем, ды галоўнае – жывая! А здароўе, вядома ж, страчана.

Вельмі ўдзячна калектыву раёнкі «Петрыкаўскія навіны». Напісала верш пра работу гэтага, лічы, жаночага калектыву, шчырага, працавітага, якога не палохае ніякая «карона». Хачу падараваць ім гэты твор цалкам».

Вось некалькі ўрыўкаў з паэтычнай спробы Ніны Андрэеўны: «Карона» ўпала раптам

на планету, Дашчэнту напалохала людзей. Нам перажыць бы пошасць гэту, З суседкай стрэцца мне б хутчэй... Чытаю «Петрыкаўскія навіны» – Там, здаецца, няма хворых! Пчалой шчыруе тут Галіна, Рупіцца да сёмага поту... Калектыў жаночы, працавіты Нясе навіны жыхарам раёна. Прыгажуні, і да працы

прагавіты! Хай жа не зачэпіць іх «карона»!