Трохмоўная плынь

У зборніку паэзіі і прозы пад назвай «ТечіЯ» прадстаўлены вершы і проза 20 гомельскіх літаратараў

Сумеснае выданне Саюза пісьменнікаў Украіны і Міжнароднага саюза пісьменнікаў і дзеячаў мастацтва скіравана на ўмацаванне ўзаемасувязей літаратараў Беларусі, Украіны, Расіі.

Старонкі гэтай кнігі сапраўды нагадваюць няспешнае цячэнне ракі. Спачатку чытач знаёміцца з украінскай, пасля – расійскай хвалямі, а потым «акунаецца» ў вялікую беларускую плынь паэзіі і прозы. Як зазначае ўкладальнік зборніка кіраўнік Саюза пісьменнікаў Украіны, першы сакратар Міжнароднага саюза пісьменнікаў і майстроў мастацтва Анатоль Міроненка, зроблена гэта дзеля таго, «…щоб впадати разом в бурхливий океан життя».

У зборнік увайшлі творы больш як сямідзесяці аўтараў, што пішуць на сваіх родных мовах. І кожная сустрэча на старонках «Течіі» – гэта рух насустрач невядомаму, знаёмства з уласным творчым «я» пісьменнікаў трох краін. Чытачам, напрыклад, будзе цікава сустрэцца з цудоўнай паэзіяй Уладзіміра Нарбута, Юрыя Збітнева (раптоўна пайшоў з жыцця ў пачатку бягучага красавіка – заўв. аўтара), Уладзіміра Сарочкіна, Ізяслава Катлярова і іншых творцаў, імёны якіх добра вядомы ў нашых краінах.

– Як толькі пазнаёмішся з першым «украінскім ручайком» і паціху павандруеш па вершаванай і празаічнай стыхіях, адразу зразумееш, што цячэнне пачуццяў, эмоцый, спадзяванняў, мар, натхнення, расчаравання ў нас такое блізкае, такое роднае… Яно, па сутнасці, у нас адно. І мы, зразумела, застанемся назаўжды самымі блізкімі славянскімі народамі, што б ні рабілі асобныя недальнабачныя палітыкі, якія больш пазіраюць у бок Захаду, – адзначыў празаік, старшыня Гомельскага абласнога аддзялення Саюза пісьменнікаў Беларусі Уладзімір Гаўрыловіч.

Аналізуючы новае выданне, у якім шырока прадстаўлены творы пісьменнікаў-гамяльчан, Анатоль Міроненка падкрэсліў: «Нам, славянскім творцам, трэба заўжды трымацца разам, як гэта было на працягу стагоддзяў. Раз’яднанне ніколі нікому не прыносіла карысці. Пісьменнікі заклікаюць у сваіх творах нашы народы вельмі беражліва, з павагай ставіцца адзін да аднаго, мацаваць дружбу між славянамі».

«ТечіЯ» – яркі прыклад творчага разумення і супрацоўніцтва літаратараў. Разам з новым трохмоўным міжнародным альманахам «Літара. Литера. Ліцера», які выходзіць з 2019 года ў Гомелі, гэтыя выданні будуць шырока прэзентаваны чытачу на міжнародным фестывалі-свяце «Славянскія літаратурныя дажынкі – 2021», што пройдзе на Гомельшчыне ў верасні.