Шчыра, па-зямляцку віншуем!
Пісьменнік-паляшук Рыгор Бабчанок адзначаны за творчасць для дзяцей літаратурнай прэміяй імя Васіля Віткі
Сваю вядомасць на зямлі роднай Гомельшчыны Рыгор Уладзіміравіч здабыў найперш як кіраўнік адметнай гаспадаркі ў Ельскім раёне – КСУП «Саўгас «Камуніст».
Кіраваў ёю звыш 30 гадоў, увекавечыўшы на дахах ферм і іншых пабудоў, на каменнях-валунах узоры і сваёй шчырай, чалавечнай творчасці. Яго рыфмы і сёння натхняюць на працу, дораць усмешкі.
Неаднаразова і журналісты старэйшай газеты рэспублікі «Гомельскай праўды» сустракаліся з Рыгорам Бабчанком у час камандзіровак. Адкрытасць, душэўнасць, дасціпны народны гумар кіраўніка пакідалі ўражанне пра яго як сапраўднага рэлікта Палесся. Свае вершы ён каторы ўжо год нібы чэрпае з крыніц Жыткаўшчыны і Ельшчыны, не ўпрыгожваючы іх штучна, не аздабляючы ненатуральна. Яны – з самога жыцця народа і для яго. Таму і сам аўтар-хлебароб, выдаўшы тры кнігі «Асалода», «Вяртанне», «Вышыня», ужо пры жыцці становіцца народным, яго часта цытуюць.
Рыгор Уладзіміравіч шмат зрабіў у сваёй гаспадарцы па развіцці культуры, стварыўшы дзіцячую школу мастацтваў, музей побыту пакінутых вёсак, народны фальклорна-этнаграфічны калектыў. Падтрымку кіраўніка адчувалі і школы раёна. Гаспадарка не раз станавілася лідарам па добраўпарадкаванні тэрыторыі, шмат перадавікоў сельскагаспадарчай вытворчасці з «Камуніста» віншавалі на дажынках. А ў верасні 2020 года Бабчанок ужо сам браў удзел як паэт, член Саюза пісьменнікаў Беларусі ў літаратурных дажынках абласнога аддзялення Саюза пісьменнікаў Беларусі, чытаў свае вершы ў Гомелі са сцэны абласнога грамадска-культурнага цэнтра. Ён адзначаны медалём «За вялікі ўклад у літаратуру». А цяпер яшчэ і медалём Васіля Віткі за творы для дзяцей.
Сады, палеткі, зеляніну
І майскай ночы цеплыню,
Сваё жыццё, сваю краіну
На рай замежны не змяню!
У гэтых радках нібы наросхрыст душа паэта-селяніна Бабчанкі.