Нават думкі не прыйшло, каб кранаць чужое
Жыхарка Петрыкава знайшла на дарозе кашалёк, дзе было 8600 долараў, і аднесла яго ў міліцыю
Супрацоўніца раённага цэнтра гігіены і эпідэміялогіі Лідзія Малькова расказала, што 24 сакавіка вяла дачку Ганну ў дзіцячы садок. Па вуліцы Розы Люксембург дзяўчынка заўважыла кашалёк.
Ганна прапанавала: «Мама, давай пакладзем яго на лавачку, гаспадар вернецца і знойдзе страту». Але Лідзія растлумачыла малой, што такія рэчы пакідаць без нагляду не варта. Жанчына адвяла дачушку ў садок і паспяшалася ў міліцыю.
– Папярэдне я адкрыла кашалёк, спадзявалася, што знайду дадзеныя ўладальніка. Але там была адна фотакартка жанчыны, якую я ведала толькі візуальна: ні імя, ні прозвішча. Вядома, заўважыла вялікую колькасць валюты, але лічыць чужое не ў маіх правілах, – адзначыла гераіня.
Пасля звароту ў міліцыю высветлілася, што ў кашальку знаходзілася 8600 долараў, а сама рэч належыць жыхару аднаго з аграгарадкоў раёна. Страту вярнулі гаспадару, мужчына сустрэўся і аддзячыў Лідзіі Мальковай.
За садзейнічанне органам унутраных спраў жанчына атрымала грашовае заахвочванне ў памеры трох базавых велічынь (96 рублёў).
– Магчыма, нехта будзе лічыць мой учынак глупствам, маўляў, магла пакінуць немалыя грошы сабе. Але іншага выйсця, як звярнуцца ў міліцыю, я не ўяўляю. Мяне так выхавала матуля, таму нават думкі не прыйшло, каб кранаць чужое, – падзялілася Лідзія Малькова.
Трэба заўважыць, што прысваенне маёмасці ў асабліва буйным памеры караецца, згодна з артыкулам 215 Крымінальнага кодэкса Беларусі, грамадскімі працамі, або штрафам, або арыштам на тэрмін да трох месяцаў.
– Ваш учынак – не толькі ўзор адказнасці і грамадзянскай пазіцыі. Вы дапамагаеце нам стварыць атмасферу даверлівасці і бяспекі ў соцыуме, – звярнуўся да Лідзіі Мікалаеўны начальнік АУС Петрыкаўскага райвыканкама Аркадзій Масійчук. – Дзякуючы такім, як вы, у грамадстве мацнее вера ў шчырасць і дабрыню людзей.