...І злавілі велізарны штраф!
Памер урону, што нанеслі двое электравудзільшчыкаў, якія гэтым варварскім спосабам здабывалі рыбу на рацэ Мышанка (тэрыторыя Дабромысленскага сельсавета, тут Мышанка ўпадае ў Шчару), сапраўды моцна ўражвае – больш за 165 000 рублёў. Дадзеную суму яны павінны будуць пагасіць дзяржаве.
Браканьеры – ужо немаладыя мужчыны, адзін з іх пражывае ў адным з населеных пунктаў Дабромысленскага сельсавета, другі таксама ўраджэнец гэтых месцаў, але пражывае ў суседнім раёне – з дапамогай забароненага электралавільнага абсталявання, прынцып работы якога аснаваны на выкарыстанні электрамагнітнага поля, злавілі каля 900 экзэмпляраў рыбы (каля 100 кг) – шчупакі, плотка, акуні, ментузы... Хутчэй за ўсё, спадзяваліся, што ў гэты «мядзвежы куток» ніхто не зазірне, але яны жорстка памыліліся: інспектары Бярозаўскай міжраённай інспекцыі аховы жывёльнага і расліннага свету «накрылі» гэтых двух гора-рыбакоў, як кажуць, на месцы.
Пачаўся падлік урону, ён залежыць ад колькасці экзэмпляраў вылаўленай рыбы і ў выпадку, калі ўлоў здабыты з выкарыстаннем электралавільнага абсталявання, памнажаецца на пяць. Заканадаўца невыпадкова ўстанавіў такія «тарыфы»: электравуда знішчае ўсё на сваім шляху, нават мікраарганізмы, якія знаходзяцца ў донным слоі – фактычна пасля такіх рыбаловаў застаецца мёртвы ўчастак вадаёма. Гэта праз ячэйкі сеткі ці невада дробная рыба можа ўцячы, ад электравуды не ўцячэш.
Вынік падліку – прыродзе і дзяржаве гэтымі гора-рыбаловамі нанесены ўрон у памеры болей за 165 000 рублёў, дадзеную суму мужчыны павінны будуць пакрыць. Узбуджана крымінальная справа, санкцыя артыкула Крымінальнага кодэкса (паколькі ўрон у асабліва буйным памеры) прадугледжвае толькі пазбаўленне волі (тэрмін да шасці гадоў) са штрафам.
Хтосьці скажа, што пакаранне гэтых мужчын празмернае, але кожны, хто спрабуе здабываць рыбу з выкарыстаннем электралавільнага абсталявання, цудоўна ведае, чым ён рызыкуе (дарэчы, год назад прыкладна ў тых мясцінах былі затрыманы браканьеры з невадам, якія таксама былі пакараны). У дадзеным выпадку многае паказвае на тое, што справа ў мужчын была пастаўлена «на паток», нават іх матацыкл быў пераабсталяваны пад перавозку электралавільнага абсталявання. З другога боку, яны злавілі 100 кілаграмаў рыбы – гэта многа, улічваючы, што тая ж плотка важыць 100-200 грамаў. Рыба гэтая стала залатой для браканьераў.
І хтосьці павінен быў спыніць гэтых варвараў!
Андрэй ПРАДЗІЛЬШЧЫКАЎ, старшы следчы івацэвіцкага райаддзела Следчага камітэта Рэспублікі Беларусь.