Дзімітрыеўская субота – 7 лістапада
Сёлета інтэрнэт сыграў, як кажуць, злы жарт з вернікамі праваслаўя і з аўтарам радкоў – на розных сайтах значыліся розныя даты бліжэйшай памінальнай суботы.
І 10, і 24, і 31 кастрычніка…
Але Дзімітрыеўская бацькоўская субота, калі сталі разбірацца, сапраўды мае пераходную дату, толькі яна залежыць ад канкрэтнай гістарычнай падзеі – Кулікоўскай бітвы і дня памяці канкрэтнага святога – велікамучаніка Дзімітрыя Салунскага.
У Кулікоўскай бітве атрымаў перамогу над татара-манголамі ў 1380 годзе князь Дзмітрый Данскі, нябесным заступнікам якога быў Дзімітрый Салунскі. Пасля бітвы штогод сталі служыць памінальныя богаслужэнні па ўсіх рускіх воінах, якія загінулі ў бітве. Для гэтага і ўстанавілі асаблівую памінальную суботу – суботу перад днём памяці святога велікамучаніка Дзімітрыя Салунскага. Паступова Дзімітрыеўская субота стала днём памінання ўсіх памерлых праваслаўных хрысціян. Дзень памяці святога велікамучаніка Дзімітрыя Салунскага штогод прыпадае на 8 лістапада па новым стылі, а субота перад гэтай датай сёлета выпадае на 7 лістапада.
Насамрэч, душы нашых продкаў не маюць патрэбы ні ў помніках на магілах, ні ў памінальных вячэрах, ні ў пахвалах аб іх жыццёвых заслугах. Адзінае, у чым ёсць патрэба і неабходнасць для душы памерлых – малітва жывых. Малітва, каб міласцівы Бог дараваў ім зямныя грахі і спадобіў іх Царства Нябеснага. Сам памерлы ўжо не можа маліцца за сябе, не можа падаць міласціну і таму чакае гэтага ад тых, каго пакінуў на зямлі.
Падрыхтавала Валянціна БОБРЫК.