Новыя тэхналогіі і сацыяльныя гарантыі зрабілі сельскагаспадарчую галіну прывабным месцам работы
На гэта звяртае ўвагу Раман
Жук, першы намеснік старшыні райвыканкама, начальнік райсельгасхарчу. З ім мы сустрэліся напярэдадні прафесійнага свята.
– Раман Барысавіч, традыцыйнае інтэрв’ю з вамі давайце пачнём з традыцыйнага пытання: якім быў сельскагаспадарчы 2020 год, што падыходзіць да свайго завяршэння?
– Аграрыі Івацэвіцкага раёна ў большасці сваёй з удзячнасцю праводзяць 2020 год. Канешне, мелі месца некаторыя калізіі, якія не парадавалі, але, у цэлым, назіраецца няўхільны рух наперад. Аграрны комплекс стаў больш моцным, фінансава ўстойлівым. Так, выручка ад рэалізацыі прадукцыі, работ і паслуг па сельскай гаспадарцы за студзень-жнівень склала 92 573 тыс. руб., або 115,4 працэнта да аналагічнага перыяду мінулага года; рэнтабельнасць рэалізаванай прадукцыі – 10,5 працэнта. Усе сельскагаспадарчыя арганізацыі раёна забяспечылі прыбытковую работу. У агульным аб’ёме выручкі каля 70 працэнтаў складае прадукцыя жывёлагадоўлі. Яшчэ колькі важных лічбаў.
За 10 месяцаў бягучага года атрымана 95 529 тон малака, што складае 105 працэнтаў да адпаведнага перыяду 2019 года (прыкладна 90 працэнтаў – вышэйшы сорт і «Экстра»). Прадукцыйнасць дойнага статка павялічылася на 4 працэнты (або на 191 кг), сярэдні надой малака ад каровы за 10 месяцаў склаў амаль 5 000 тон. Дастойны паказчык! Некалькі гадоў назад мы ледзь маглі такі паказчык дасягнуць за год. Павялічылася пагалоўе буйной рагатай жывёлы на 268 галоў і зараз складае 55 680, у іх ліку 19 337 кароў.
Валавая вытворчасць зерня (без уліку кукурузы) склала 70 301 тону або 109,6 працэнта да мінулага года, ураджайнасць зерневых вырасла, як і валавая вытворчасць рапсу. А вось з бульбай і цукровымі буракамі ат
рымаўся недабор, але для гэтага ёсць аб’ектыўныя прычыны – засуха ўдарыла па гэтых культурах якраз у той перыяд, калі яны найбольш мелі патрэбу ў вільгаці. Тым больш крыўдна, што ў сельгаспрадпрыемствах зрабілі ўсё магчымае для атрымання добрага ўраджаю.
– У гутарках з прадстаўнікамі маладога пакалення часта даводзілася чуць, што яны абралі працу ў сельскай гаспадарцы, бо бачаць тут многа пераваг і бонусаў.
– Нічога дзіўнага! У сельгаспрадпрыемствах работнікам прадстаўляецца камфартабельнае жыллё з усімі інжынернымі і камунальнымі зручнасцямі, якое з цягам часу можна выкупіць, – яно стане тваім. Дапамогуць і з пераездам. Хіба гэта малы бонус?