Новыя тэхналогіі і сацыяльныя гарантыі зрабілі сельскагаспадарчую галіну прывабным месцам работы
Заканчэнне. Пачатак на 2-й стар.
У шэрагу гаспадарак работнікі маюць высокія заробкі, яны пад увагай прафсаюзных арганізацый. Прадстаўляюцца пуцёўкі ў санаторыі, падарункі на прафесійныя святы, на Дзень маці, на Дзень жанчын, на Новы год… Змяніўся і характар працы. У новых сучасных кароўніках і цялушачніках людзі значна менш працуюць фізічна, асноўную работу выконваюць пагрузчыкі, раздатчыкі. Некаторыя жывёлаводы ў сваіх чыстых і дагледжаных памяшканнях нібы дырэктары выглядаюць. На новых фермах і комплексах цудоўныя санвузлы, душавыя, пакоі адпачынку…
А некалі трэба было ўручную гной віламі выкідваць… Хаця, канешне, мадэрнізацыю на фермах і комплексах не правядзеш імгненна.
– Мы штогод адзначаем працоўныя калектывы ААТ «Святая Воля», ААТ «Квасевічы», СВУ «Даманава»… У той жа час мала чуеш пра поспехі і дасягненні ААТ «Целяханы-агра», ААТ «Аброўскі», ААТ «Мічурынск»… Што можа стаць штуршком для развіцця гэтых сельгаспрадпрыемстваў?
– Адно скажу: без тэхнічнага абнаўлення і без будаўніцтва новых сучасных малочнатаварных ферм немагчыма стаць паспяховым. Рэканструкцыя дазволіць гэтым аб’ектам і гэтым сельгаспрадпрыемствам стаць больш прывабнымі – тут стане менш ручной працы, будуць высокімі зарплаты. Адпаведна, прыйдзе моладзь.
– А калі гаварыць больш канкрэтна…
– Адносна нядаўна новае памяшканне на 360 галоў буйной рагатай жывёлы з’явілася ў ААТ «Аброўскі», у «Мічурынску» ўводзіцца новы малочнатаварны комплекс на 1 000 галоў… Вядзецца рэканструкцыя з будаўніцтвам даільнага малочнага блока ў «Перамозе», а ў «Святой Волі» і ў «Квасевічах» пабудаваны новыя комплексы. У «Горталі» закладзены новы падобны комплекс (увядуць у эксплуатацыю ў наступным годзе), з’явяцца падобныя аб’екты ў шэрагу іншых гаспадарак. Падтрымка дзяржавы адчуваецца, тэхнічнае пераўзбраенне дазволіць зацікавіць моладзь да працы на гэтых аб’ектах…
– Не магу не спытаць пра кармы. Мінулыя гады паказалі, што «неба» можа моцна засмуціць аграрыя: выгараюць пашы і палі так, што няма што касіць, нарыхтоўваць…
– Мы сапраўды ў многім залежым ад неба… Толькі жорсткае выкананне тэхналагічных дысцыплін дазволіць атрымаць патрэбны максімум. Не трэба надвор’ем «прыкрывацца», многіх праблем можна пазбегнуць, калі дзейнічаць аператыўна, працаваць якасна… Што тычыцца бягучага года, то зімоўку чакаем са спакойным сэрцам: дастаткова сказаць, што сенажу нарыхтавана 128,5 працэнта да ўзроўню мінулага года, зернесенажу – 251,5, сіласу – 117,5 працэнта. Карацей, маем 31 кармавую адзінку на адну ўмоўную галаву буйной рагатай жывёлы.
Поспехі нашых аграрыяў адзначаны на рэспубліканскім і абласным узроўнях. Так, ААТ «Падстарынь» стала першым у намінацыі «За дасягненне высокіх паказчыкаў у вытворчасці масланасення рапсу сярод сельгаспрадпрыемстваў з плошчай уборкі рапсу не меней 100 гектараў» у вобласці. Узнагарода – 100 базавых велічынь. Адзначу таксама індывідуальную перамогу Івана Бялевіча, механізатара ААТ «Квасевічы», які заняў трэцяе месца ў ходзе абласнога спаборніцтва за дасягненне высокіх паказчыкаў на нарыхтоўцы травяных кармоў.
Карыстаючыся выпадкам, хачу павіншаваць усіх аграрыяў раёна з прафесійным святам. Няхай кожны дзень дорыць добры настрой! Шчасця, здароўя, дабрабыту, гарачага і шчырага кахання!
Гутарыў Аляксандр ГОРБАЧ.