Заўсёды першыя, заўсёды лепшыя...
Раённая арганізацыя інвалідаў па зроку рэалізуе сацыяльны праект, выйграўшы грант на рамонт даху будынка на вул. Леніна ў Івацэвічах і на набыццё сродкаў рэабілітацыі
Івацэвіцкая раённая арганізацыя БЕЛТІЗ тры гады запар станавілася лепшай у Брэсцкай вобласці, бо вялікую колькасць ініцыятыў і задумак актывісты яе і прапаноўваюць, і ўкараняюць. Як адзначае Ірына Юрэня, кіраўнік абласной структуры, такіх моцных арганізацый, як у Івацэвічах, толькі
3-4 на ўсю Беларусь. Дастаткова сказаць, што кіраўнік раённай арганізацыі Іван Каленік уваходзіць у склад рэспубліканскага Савета РА ГА «БЕЛТІЗ».
«ІВ» неаднаразова адзначаў поспехі і дасягненні нашых белтізаўцаў. Сёння раскажам пра семінар, што прайшоў у мінулы аўторак, 10 лістапада, на які было запрошана кіраўніцтва абласной структуры БЕЛТІЗ, упраўлення па працы, занятасці і сацыяльнай абароне райвыканкама, сябры і члены арганізацыі. Як адзначыў на пачатку мерапрыемства Іван Каленік, ёсць добрая нагода для сустрэчы, бо адыходзячы год стаў па-сапраўднаму прарыўным для аб’яднання інвалідаў па зроку Івацэвіччыны. Праектная заяўка на грант праграмы «Польская дапамога» была прынята і задаволена. Як вынік, на патрэбы раённай арганізацыі БЕЛТІЗ выдзелена каля 25 000 еўра. Большая частка грошай пойдзе на рамонт даху будынка па вул. Леніна, 21а, які кіраўніцтвам Івацэвіцкага раёна ў сакавіку 2019 года быў бязвыплатна перададзены раённай структуры БЕЛТІЗ і зараз з’яўляецца офісам арганізацыі.
– Большасць з нас добра памятае, у якім стане быў гэты будынак, яму ж амаль 70 гадоў! – гаварыў на імправізаваным мітынгу Іван Каленік. – За гэты час уласнымі сіламі і з да
Раённая арганізацыя інвалідаў па зроку мае ўласныя веласіпедытандэмы, на іх могуць пракаціцца члены арганізацыі, хто дзесяцігоддзі не сядаў за руль.
памогай кіраўніцтва раёна, спонсараў былі падведзены каналізацыйныя і водаправодныя сеткі, абсталяваны санвузел з усім неабходным абсталяваннем, устаноўлены новыя дзверы і вокны ПВХ, праведзена сістэма ацяплення з устаноўкай новых радыятараў і катлоў, праведзены электрамантажныя работы… Цяпер тут знаходзіцца вытворчы ўчастак УП «Элкіс», пакой псіхалагічнай разгрузкі з трэнажорамі, вось-вось запрацуе сацыяльная цырульня, масажны кабінет і кабінеты дэкаратыўна-прыкладной творчасці і рамесніцтва.
Начальнік упраўлення па працы, занятасці і сацыяльнай абароне райвыканкама Аляксандр Велікаселец падзякаваў за актыўнасць членам раённай арганізацыі: толькі пяць падобных ініцыятыў у Беларусі атрымалі падтрымку, у іх ліку праект нашых белцізаўцаў. Цёплым было выступленне былога дэпутата Палаты Прадстаўнікоў Нацыянальнага сходу Рэспублікі Беларусь Леаніда Кавалевіча, якога інваліды па зроку лічаць сваім лепшым сябрам і які стаяў ля вытокаў адкрыцця вытворчасці і спрыяў перадачы дадзенага будынка.
Усе прысутныя змаглі ўпэўніцца, што работа па рамонце даху ўжо ідзе, змаглі адчуць, што новы офіс напоўнены цяплом і любоўю, як адзначала Ірына Юрэня. Засталіся апошнія штрыхі, каб запрацавалі цырульня і масажны кабінет, кабінет дэкаратыўна-прыкладной творчасці і рамесніцтва.
На сродкі гранта «Польская дапамога», як плануецца, будуць набыты ноўтбукі, відэапавелічальнікі, смартфоны з сінтэзатарам мовы, плэеры… А веласіпеды-тандэмы, велаабсталяванне, турыстычнае адзенне ўжо набытыя. У гэты дзень многія інваліды па зроку змаглі ажыццявіць мару – сесці за руль веласіпеда і праехацца. Як адзначае актывіст арганізацыі Валянціна Кавалевіч, яна за апошнія 20 гадоў ні разу не села на веласіпед, а сёння змагла. Такіх транспартных сродкаў у раёне больш няма ні ў кога, а вось інваліды па зроку змаглі іх атрымаць.
Як бачыце, людзі з абмежаванымі магчымасцямі часам могуць зрабіць і дабіцца больш, чым цалкам здаровыя людзі.
Аляксандр ГОРБАЧ (фота аўтара).