Сярод зладзеяў і 13-гадовая дзяўчына
У адной з буйных вёсак, што месціцца каля Івацэвічаў, зафіксаваны крадзеж з жылога дома. Як удалося высветліць супрацоўнікам РАУС, непрыгожы ўчынак на сумленні 16-гадовага юнака і… яго 13гадовай сяброўкі. Дадзеная пара ведала, куды гаспадары кладуць ключ, пакідаючы дом, скарысталіся гэтым, адкрылі дзверы і ўкралі тэлепрыстаўку, двое навушнікаў, зараднае прыстасаванне… Узбуджана крымінальная справа ў адносінах да 16-гадовага хлопца (ён, дарэчы, раней меў праблемы з законам), а вось у адносінах да дзяўчыны адмоўлена ва ўзбуджэнні справы – не дасягнула ўзросту крымінальнай адказнасці.
ХХХ
У Быцені мясцовы 55-гадовы жыхар зайшоў у прыватны магазін «Верас», адкрыта завалодаў бутэлькай піва (1,9 літра) і, не рэагуючы на крыкі прадаўца, пакінуў памяшканне. На месца выклікалі міліцыю, у адносінах да гэтага мужчыны ўзбуджана крымінальная справа па арт. «Рабаванне».
ХХХ
Крадзеж зафіксаваны ў Даманаве, дзе раней судзімы 25-гадовы мясцовы жыхар добра пажывіўся ў гаспадарчай пабудове жыхара Даманава – вынес шліфмашыну, электрадрыль, дамкрат, набор слясарнага інструменту...
ХХХ
Міліцыя займаецца пошукам злодзея, які ўкраў самаробны аўтапрычэп у жыхара Івацэвічаў (на вул. Гука). Зноў-такі, сур’ёзных перашкод для злодзея гаспадары не стварылі, таму крадзеж і адбыўся.
Калі вы, шаноўныя грамадзяне, будзеце ключ ад дома ці кватэры, хаваць пад дыванок на ўваходзе, то не здзіўляйцеся, што дзверы вашага жытла лёгка можа адкрыць нават 13-гадовае дзіця.
Аляксандр КІКУН, начальнік аддзялення крымінальнага вышуку Івацэвіцкага РАУС.