«Вашы грошы накіраваны... у Панаму»
Жыхары Івацэвіцкага раёна працягваюць «падтрымліваць рублём» інтэрнэт-прайдзісветаў па ўсім зямным шары
Падман і выцягванне грошай з банкаўскіх плацежных картак атрымаў неверагодны размах. У параўнанні з мінулым годам у Івацэвіцкім раёне больш, чым у тры разы, павялічылася колькасць людзей, хто паведаміў рэквізіты сваёй карткі незнаёмым людзям і застаўся без грошай. Важны момант: асноўная катэгорыя падманутых – а іх ужо больш за 50 чалавек – моладзь ва ўзросце да 30 гадоў.
Больш сталыя людзі асцярожна ставяцца да кантактаў з незнаёмцамі, а вось «продвинутая» моладзь – не. Пасля яны бягуць у міліцыю – дапамажыце! Разбіраемся – і высвятляецца, што атрымальнік плацяжу грамадзянін Панамы, Зімбабве… Але як знайсці іх і прыцягнуць да адказнасці?
Адзначым два асноўныя спосабы падману нашых грамадзян. Першы: тэлефанаванне ад «прадстаўніка» банка, маўляў, з вашай банкаўскай карткай невядомыя махляры праводзяць падманныя дзеянні, таму важна яе паспець заблакіраваць. Для гэтага трэба пацвердзіць, што вы з’яўляецеся яе ўласнікам і назваць рэквізіты.
І хаця пра гэта папярэджвалі, напэўна, сотні разоў, нашы грамадзяне працягваюць наступаць на гэтыя граблі і паведамляюць не толькі нумар пластыкавай карткі з 16 сімвалаў, але і CVV (Cvc)-код, які ні ў якім разе нельга паведамляць нікому.
Такія падманутыя грамадзяне маглі б звярнуць увагу, што тэлефанаванне паступае з Расіі, Літвы, Украіны, Польшчы. Калі вы картку атрымлівалі ў банкаўскім аддзяленні Івацэвічаў, то чаму вам тэлефануюць з-за мяжы?
Другі спосаб падману тычыцца тых грамадзян, хто ажыццяўляе продаж тавару на гандлёвых пляцоўках, найчасцей гэта «Куфар». Прадаўцу прыходзіць паведамленне, што тавар спадабаўся, унесена перадаплата (высылаецца скрыншот электроннага карт-рахунку), скідваюць ссылку на падманную старонку, дзе прадавец павінен увесці нумар карты, імя і, галоўнае, CVV (Cvc)-код, які змешчаны на зваротным баку карткі.
Так рабіць ні ў якім разе нельга, бо пасля атрымання гэтых канфідэнцыяльных звестак зламыснік здзяйсняе крадзеж.
Каб не стаць ахвярай інтэрнэт-злачынцаў:
Падтрымлівайце зносіны з пакупнікамі і прадаўцамі толькі ва ўнутраным чаце гандлёвай пляцоўкі. Не пераходзьце па ссылках, на якія вам прапаноўваюць перайсці.
Насцярожана стаўцеся да неабходнасці ўводзіць дадзеныя вашай банкаўскай пластыкавай карткі. Калі нікому не паведаміце рэквізіты – вашы грошы не прападуць.
Удакладніце ў субяседніка нумар тэлефона і патэлефануйце па ім, каб упэўніцца, што маеце справу з рэальным чалавекам, які пражывае ў Беларусі.
Выкарыстоўвайце асобную банкаўскую картку для ажыццяўлення пакупак у інтэрнэце.
Калі вам паступіў званок з «банка», ні ў якім разе не паведамляйце інфармацыю аб сабе і сваёй банкаўскай плацежнай картцы. Сапраўдны супрацоўнік банка ніколі не стане цікавіцца канфідэнцыяльнай інфармацыяй у тэлефонным рэжыме.
Калі ў вас актывізавана паслуга «плацяжы ў сеці інтэрнэт», а вы не карыстаецеся ёй – адключыце яе! Камунальныя плацяжы вы зможаце аплачваць і без гэтай паслугі. Вадзім ЛІШКО, начальнік Івацэвіцкага райаддзела Следчага камітэта
Рэспублікі Беларусь.