Выклікалі ДАІ і... пашкадавалі

На сённяшні дзень каля паловы дарожна-транспартных здарэнняў, якія адбываюцца ў Беларусі, афармляюцца з дапамогай еўрапратакола без выкліку супрацоўнікаў ДАІ. Такім чынам, калі сутыкнуліся толькі два аўтамабілі і не нанесена шкода здароўю ўдзельнікаў дарожнага руху, а пашкоджаны толькі машыны, калі абодва вадзіцелі маюць дамовы абавязковага страхавання і вадзіцельскія пасведчанні, абодва ў цвярозым стане і няма спрэчнага пытання, хто вінаваты, а хто не, і калі абодва згодны, што ўрон не перавышае 800 еўра, то аформіць ДТЗ можна самастойна.

Не выклікаючы міліцыю.

На самай справе, гэта выгадна абодвум удзельнікам дарожнага руху: так, пацярпелы хутчэй атрымае кампенсацыю ад страхавой кампаніі, калі вырашэнне пытання абыдзецца без ДАІ. Але калі выклікаюць супрацоўнікаў Дзяржаўтаінспекцыі, то працэдура зацягваецца: запаўняецца 7-8 бланкаў, людзі нервуюцца, злуюцца, чаму не вырашылі пытанне самі, з дапамогай еўрапратакола, бо траціцца шмат часу.

Так, на жаль, многія нашы грамадзяне выклікаюць ДАІ, нават калі аўтамабіль атрымаў невялікую драпіну. Але вось пра што забываюць удзельнікі здарэння: усе дарожна-транспартныя здарэнні дзяржаўтаінспектар разглядае на прадмет таго, ці створана пры гэтым аварыйная абстаноўка. Калі гэта так (што здараецца даволі часта), то вінаваты ў падобным нязначным ДТЗ прыцягваецца яшчэ да адміністрацыйнай адказнасці – штраф ад 5 да 25 базавых велічынь або пазбаўленне права на кіраванне транспартным сродкам да двух гадоў.

Такім чынам, вінаваты ў такім дробным ДТЗ можа моцна пацярпець, калі на месца здарэння выедзе супрацоўнік ДАІ. Чамусьці пра гэта забываюць удзельнікі дарожнага руху, пасля яны скардзяцца і абураюцца. Параю ўсім вадзіцелям па магчымасці вырашаць пытанні па-мірнаму, самастойна, калі вы бачыце, што ўрон ад здарэння не дасягае 800 еўра і ўсе астатнія пункты, пра якія гаварылася вышэй, выконваюцца.