У гэтым годзе «крызісным пакоем» не карысталіся
Аднак гэта не гаворыць аб тым, што гвалту ў сем’ях стала менш
Ужо сем гадоў у нашым раёне пры ДУ «Івацэвіцкі ТЦСАН» існуе «крызісны пакой». Гэта той самы бяспечны прытулак, на які можа разлічваць ахвяра гвалту, як правіла, гэта жанчыны, дзеці ці састарэлыя людзі. Але нягледзячы на тое, што прызначэнне такіх пакояў зразумелае і празрыстае, попытам такі бяспечны дах над галавой пакуль не карыстаецца.
Так, у мінулым годзе ў Івацэвічах толькі аднойчы пакоем скарысталася пацярпелая жанчына. Прыкладна такія ж лічбы і па краіне, у сярэднім дзверы такіх «крызісных пакояў» для ахвяр гвалту адчыняюцца раз-два ў год. Чаму? Бо далёка не кожная жанчына ці не кожны сталы чалавек пазвоніць у міліцыю ці на «тэлефон даверу», і далёка не кожны пасля згадзіцца пераначаваць у пакоі да выпраўлення сітуацыі. Многія на сваю рызыку застаюцца начаваць побач з крыўдзіцелем. Нехта баіцца, некаму сорамна выносіць «сор из избы».
Але ці трэба грэбаваць такой магчымасцю выратаваць сабе? Тым больш, засяліцца ў «крызісны пакой» можна кругласутачна, і пражыванне ў ім бясплатнае. Як правіла, у начны час ахвяр гвалту засяляюць супрацоўнікі РАУС, якія прыбываюць на выклік. А ўжо раніцай суп
рацоўнікі цэнтра афармляюць усе неабходныя дакументы. Тут жа жанчына і, магчыма, яе дзеці могуць атрымаць псіхалагічную дапамогу ад нашага штатнага псіхолага, а таксама гуманітарную дапамогу (можна аформіць заяву на атрыманне неабходных рэчаў), а таксама можна разлічваць на юрыдычную кансультацыю.
У пакоі ёсць усё неабходнае для начлегу і часовага пражывання: два спальныя месцы для дарослых і нават дзіцячы ложак, бытавая тэхніка, аптэчка, прадметы асабістай гігіены, набор прадуктаў. Адным словам, гэта добраўпарадкаванае жыллё для сям’і, якая нечакана і спешна пакінула месца пражывання.
Паважаныя жыхары раёна, калі вы падвергліся псіхафізічнаму гвалту, аказаліся ў цяжкай жыццёвай сітуацыі або сталі ахвярай гандлю людзьмі, вы можаце звярнуцца па дапамогу па адрасе: г. Івацэвічы, вул. Шчорса, 13 (каб. №8, 15), тэл. 2-06-27, 3-00-71, панядзелак-пятніца з 8.00 да 17.00.
Для размяшчэння грамадзян у «крызісны пакой» у ДУ «Івацэвіцкі ТЦСАН» кругласутачна дзейнічае «тэлефон даверу» (+37533) 68421-32. Таксама дапамогу можна атрымаць па тэл.102 або па тэлефоне агульнанацыянальнай «гарачай лініі»: 8-801-100-8-801 (лінія працуе штодня з 8.00 да 20.00).
Ганна КАРАЧУН, спецыяліст па сацыяльнай рабоце ДУ «Івацэвіцкі ТЦСАН».