Зноў першыя ў вобласці!
Вясной мінулага года мы радаваліся за нашу кузню сельскагаспадарчых кадраў – тады па выніках работы за 2019 год УА «івацэвіцкі дзяржаўны прафесійны ліцэй сельскагаспадарчай вытворчасці» трапіў на абласную Дошку Гонару. Супрацоўнікі і навучэнцы ўстановы адукацыі без утойвання расказвалі, на якіх «кітах» трымаецца альма-матар у такі няпросты час канкурэнцыі і барацьбы за навучэнцаў, за ўраджай і эканамічныя паказчыкі.
Напярэдадні навагодніх свят прафліцэй падзяліўся чарговай добрай навіной – УА «Івацэвіцкі дзяржаўны прафесійны ліцэй сельскагаспадарчай вытворчасці» стаў пераможцам абласнога конкурсу ў намінацыі «Лепшая ўстанова прафесійна-тэхнічнай адукацыі 2019/2020 навучальнага года» сярод устаноў прафесійна-тэхнічнай адукацыі сельскагаспадарчага профілю. Наш прафліцэй заўсёды трымаўся ў лідарах гэтага штогадовага конкурсу, некалькі гадоў таму мы былі ў тройцы лепшых. Зараз жа наша ўстанова адукацыі – лепшая. Зразумела, гэта вынік работы не аднаго дня і нават не аднаго года. Сёння ўспомнім, якім быў для нашай кузні гэты пераможны навучальны год, прабяжымся па самых яркіх момантах 2019/2020 навучальнага года.
Ключы ад трактара з рук гендырэктара
ААТ «МТЗ»
Вучэбная гаспадарка прафліцэя ў Сярадаве – гэта вялікая аўдыторыя пад акрытым небам. На плошчы ў 342,9 га пад кіраўніцтвам майстроў працоўнага навучання працуюць будучыя жывёлаводы і раслінаводы, хапае работы слесарам ды зваршчыкам. Дарэчы, вучэбныя гаспадаркі ёсць пры кожнай падобнай установе адукацыі сельскагаспадарчага напрамку. Але ў мінулым годзе наша гаспадарка ўзначальвала зводкі па намалотах і надоях.
Таму на абласных Дажынках у верасні 2020 года дырэктар Міхаіл Дымовіч атрымаў у падарунак ад гендырэктара ААТ «МТЗ» Віталія Воўка ключы ад новага трактара BELARUS 1220.5-10 912. Гэты трактар папоўніў аўтапарк прафліцэя, у якім сёння больш за сто адзінак тэхнікі. З першых дзён новенькі трактар пайшоў у справу, на ім праводзілі заняткі па ваджэнні.
Вялікі рамонт у навучальных лабараторыях
Гэтай восенню раёнка пісала, як праходзіў капітальны рамонт будынка, у якім ужо сёння займаюцца дзеці. Нагадаем, у будынку з паўвекавой гісторыяй з’явіліся расколіны на адной са сцен. Таму на сродкі, выдзеленыя Галоўным упраўленнем па адукацыі Брэсцкага аблвыканкама, тэрмінова быў праведзены рамонт. Пасля яго стары будынак цяжка пазнаць: будаўнікі ўмацавалі праблемную сцяну, уцяплілі дах, зрабілі новыя ганкі і пабудавалі пандус, нанеслі дэкаратыўную тынкоўку. Ужо
Новы трактар – у рабоце з першых дзён.
сваімі сіламі супрацоўнікі і навучэнцы прафліцэя зрабілі касметычны рамонт унутры будынка. Зараз у электрамантажнай лабараторыі, лабараторыі агародніцтва, абіўшчыка мэблі, кабінеце спецтэхналогій займаюцца як мінімум тры групы. Уваходзіны адбыліся акурат напярэдадні Новага года. Добры падарунак атрымаўся!
Доўгатэрміновы дагавор з нямецкай кампаніяй Polipol
Два гады таму ў наш раён прыйшла нямецкая кампанія, адкрыўся цэх па вытворчасці канап. Вытворчасць пашыраецца, таму хутка кампанія адчула патрэбу ў кадрах. З’явілася ідэя такога дагавора. Фірма дала заказ па колькасці маладых кадраў і, канечне, якасці падрыхтоўкі. Сёння прафліцэй па дагаворы рыхтуе групу швачак і групу абіўшчыкаў мэблі. Усяго 52 чалавекі, якія ў хуткім часе прыйдуць працаваць у цэхі кампаніі Polipol.
«Залаты» выпуск і стапрацэнтны набор
Галоўны паказчык канкурэнтаздольнасці нашага прафліцэя – гэта набор і, канечне, выпускнікі ўстановы адукацыі. У 2020 годзе выпусцілася 307 маладых спецыялістаў. 141 выпускнік атрымаў накіраванне на першае працоўнае месца. Сярод выпускнікоў мінулага года было чатыры дыпломы з адзнакай (гэта больш, чым у мінулыя гады). 106 выпускнікоў атрымалі павышаны 4 разрад па сваёй кваліфікацыі. У 2020-2021 годзе першакурснікамі ўстановы сталі 336 юнакоў і дзяўчат, 33 з іх – з асаблівасцямі псіхафізічнага развіцця.
У наступным жа годзе прафліцэй плануе набор у 338 чалавек. Не раз у размове з педагогамі гучала думка: «Нам патрэбныя поўныя аўдыторыі і лабараторыі, інакш не будзе сэнсу і натхнення працаваць». Пакуль жа ў калідорах поўна, да нас ідуць і едуць, пра наш ліцэй ведаюць суседзі і не толькі.
Кулямёт «Максім» і аўтамат ППШ у музейным пакоі прафліцэя
Гэта дакладныя копіі арыгіналаў. А зробленыя яны рукамі гурткоўцаў і педагогаў. Гэтай восенню ўстанова прымала ўдзел у Рэспубліканскім аглядзе інавацыйнай і тэхнічнай творчасці навучэнцаў і работнікаў устаноў адукацыі. Намінацыя «Макетаванне» – складаная, бо тут трэба было дакладна перадаць усе тонкасці зброі, каб нельга было на першы позірк ад
розніць ад арыгінала – інакш удзел не меў бы сэнсу. І ў нашых рабят гэта атрымалася – дыплом III ступені «на рэспубліцы» за «Зброю вялікай Перамогі». Кіраўнікі аб’яднанняў па інтарэсах «Зрабі сам» (А. П. Тажун), «Юны зваршчык» (К. С. Губарэвіч) і «Іскрынка» (А. С. Краўчэня) разам з дзецьмі не адзін тыдзень чаравалі над кулямётам і аўтаматам, якія зараз папоўнілі фонд музейнага пакоя.
Гэты конкурс, канечне, не адзіны ў мінулым навучальным годзе, наш прафліцэй любіць творчыя і прафесійныя спаборніцтвы. Так, мы заваявалі дыпломы II і III ступені на абласным конкурсе прафмайстэрства па кваліфікацыі «Трактарыст-машыніст», россып дыпломаў атрымалі нашы ўдзельнікі на абласным этапе інфармацыйна-прафарыентацыйнага праекта «ПРАФ-БУМ-2020», але галоўнае – гэта другое месца ў намінацыі «Ёсць заказ на рабочы клас». Чацвёрты год запар наш прафліцэй на 100 працэнтаў выконвае план па наборы.
Другасная занятасць і прырост у грамадскіх арганізацыях
Ва ўстанове адукацыі дзейнічалі два студэнцкія атрады: імя Героя Савецкага Саюза П. І. Марозава і імя М. Гойшыка. У гэтых атрадах вясной 2020 года на пасадцы дрэў працавалі 48 навучэнцаў прафліцэя. Экалагічныя атрады працавалі на базе Івацэвіцкага і Жытлінскага лясніцтва. Яшчэ 12 чалавек у складзе сельгасатрада шчыравалі на зернятоку ў ААТ «Івацэвічыагратэхсэрвіс» і ААТ «Новыя Стайкі». Свой першы рубель зарабілі 40 навучэнцаў у летнім лагеры працы і адпачынку «Сузор’е-2020». Дзеці папрацавалі ад душы, іх старанні былі ацэнены і рублём, і ўзнагародамі. Раённы камітэт ГА «БРСМ» адзначыў самых актыўных работнікаў і камандзіра студатрадаў Падзякамі. Менавіта ў прафліцэі на сённяшні дзень дзейнічае лепшы сельгасатрад у раёне. Кіраўніцтва ўстановы адукацыі прыцягвае да работы ў атрадах, як правіла, праблемную моладзь. Вольны час работай запаўняюць дзеці-сіраты, дзеці, якія знаходзяцца ў сацыяльна небяспечным стане і на розных відах уліку. Дарэчы, у апошнія гады работа ў напрамку занятасці, а таксама ў далучэнні моладзі ў грамадскія арганізацыі ажывілася. Сёлета амаль у два разы больш дзяцей атрымалі першыя заробкі за работу ў студатрадах, а пярвічка ГА «БРСМ» толькі за год вырасла з 40 чалавек да 103. Дзеці працуюць, прымаюць удзел у акцыях і мерапрыемствах, дапамагаюць ветэранам вайны і адзінокім пажылым людзям.
Такі быў гэты вельмі ўдалы і рэзультатыўны навучальны год ва ўстанове адукацыі, можаце быць упэўненыя – гэта далёка не ўсё. У прафліцэі кіпіць жыццё, вучнёўскае і творчае. Гэта дае свой плён, працуе на вынік і імідж установы. Віншуем з перамогай, прафліцэй!
Наталля ГЕРБЕДЗЬ. Фота з архіва прафліцэя.