У дзелавым фармаце
Дэлегат VI Усебеларускага народнага сходу, галоўны ўрач УАЗ «Івацэвіцкая ЦРБ» Васіль Юзефовіч пасля вяртання з форуму правёў сустрэчы з калектывамі пяці ўстаноў раёна – яны прайшлі 16 і 17 лютага. Нямала работнікаў раённай, Целяханскай і Косаўскай гарадскіх бальніц, Целяханскага і Косаўскага дамоў-інтэрнатаў для састарэлых і інвалідаў пажадалі паслухаць дэлегата, а хтосьці меў намер задаць яму пытанні і зрабіў гэта.
Найперш Васіль Юзефовіч распавёў пра асноўныя палажэнні праграмы сацыяльна-эканамічнага развіцця краіны на пяцігоддзе, якія абмяркоўваліся падчас сходу, абазначыў пастаўленыя задачы, пракаменціраваў ключавыя моманты рэзалюцыі. Упор у выступленнях галоўнага ўрача быў зроблены на развіццё сістэмы аховы здароўя Беларусі, а таксама развіццё эканомікі ў цэлым і эканомікі рэгіёна ў прыватнасці.
Якія пытанні задавалі Васілю Юзефовічу? У інтэрнатах, дзе з-за пандэміі да гэтай пары працуюць вахтавым метадам, чакаюць вяртання да прывычнага рэжыму работы. Паспрыяе ў гэтым пытанні вакцынацыя работнікаў ад каранавіруса. Наконт яе і гучалі пытанні: каму і калі зробяць прышчэпкі? Задавалі пытанні пра змены ў пенсійным заканадаўстве. Прысутных цікавілі перспектывы павышэння зарплаты медработнікаў. Найхутчэй, доўга чакаць не давядзецца: плануецца павышэнне акладаў урачоў у 2 разы, сярэдняга медыцынскага персаналу – у 1,5 раза. Разам з галоўным урачом разбіраліся ў тонкасцях медыцынскага страхавання.
Асобна дэлегат падзяліўся сваімі ўражаннямі ад удзелу ў форуме – людзей цікавілі арганізацыйныя моманты і многае іншае. Усё ж такі ВНС – падзея, маштабнае мерапрыемства, дэталі яго выклікаюць непадробны інтарэс. Сустрэчы прайшлі ў дзелавым фармаце. Вольга ШЭЛЯГОВІЧ.