Сіламі мераліся «Мажоры» і «Крэпкія арэшкі»
У прафліцэі прайшло мерапрыемства да Дня абаронцаў айчыны
«Ёсць такая прафесія – Радзіму абараняць…» Такое мерапрыемства 22 лютага сабрала ў актавай зале УА «Івацэвіцкі дзяржаўны прафесійны ліцэй сельскагаспадарчай вытворчасці» адразу некалькі груп навучэнцаў, а таксама гасцей. Штогод тут праходзяць такія святочныя батлы, на гэты раз спаборнічалі першакурснікі «Мажоры» і другакурснікі «Крэпкія арэшкі».
Нашых будучых байцоў і абаронцаў ацэньвалі старшыня Івацэвіцкай раённай арганізацыйнай структуры ДТСААФ Ігар Куіс, начальнік групы тэрытарыяльнай абароны ваеннага камісарыята Івацэвіцкага раёна Станіслаў Мінчук, намеснік камандзіра другога асобнага стралковага батальёна вайсковай часці 7404 Алег Раўнейка, намеснік дырэктара па навучальнай рабоце Людміла Ільчук і кіраўнік фізічнага выхавання прафліцэя Таццяна Бірук.
«Няхай пераможа мацнейшы!» – па-мужчынску коратка юнакоў натхніў на спаборніцтва Станіслаў Мінчук, і гульня пачалася! Пад сотню падцягванняў на перакладзіне на дваіх членаў у камандзе, а ў штуршку гіры (вагой у 16 кг) рэкардсменам стаў Сяргей Астахаў з каманды «Мажоры». 41 штуршок даўся нялёгка, але юнак не здаваўся. Далей юнакі спаборнічалі ў трапнасці, пакараючы пяць мішэняў, і ў адцісканні ад падлогі. Конкурс па зборцы і разборцы аўтамата АК-74 аказаўся самым складаным. Мець справу са зброяй ды яшчэ пад пільным наглядам ваенных прафесіяналаў – тут цяжка не разгубіцца. Пераможца гэтага конкурсу – Марк Бачкароў. 16-гадовы юнак справіўся з аўтаматам за адну мінуту шэсць секунд. Шумна і хутка юнакі справіліся з перацягваннем каната. Гэта толькі спартыўная частка мерапрыемства.
У творчых іспытах удзельнікам дапамаглі дзяўчынкі. Яны з закрытымі вачыма збіралі прызыўнікоў у дарогу, а пасля таксама ўсляпую сустракалі і кармілі марожаным «дэмбеляў». Будучыя мужчыны ў сваю чаргу ляпілі з шароў дзяўчыну мары, тую, якая б дачакалася з арміі свайго салдата.
«Без песень – няма салдата», – гучала са сцэны. І завяршыў праграму творчы песенны конкурс. «Мажоры» выступалі пад жывы гук – была гітара і «Група крыві на рукаве» Віктара Цоя. «Крэпкія арэшкі» ака
заліся прыхільнікамі класікі і спелі любімую ў гады Вялікай Айчыннай вайны «Кацюшу».
Моманту ісціны чакалі ўсе: і гледачы, якія шумна падтрымлівалі сваіх фаварытаў, і, канечне, самі ўдзельнікі.
– Я з радасцю падзяліў бы перамогу паміж вамі, юнакі, будучыя салдаты! – казаў Ігар Куіс, старшыня Івацэвіцкай раённай арганізацыйнай структуры ДТСААФ. – Тым больш, што амаль да канца мерапрыемства ў каманд і былі аднолькавыя балы. Я віншую ўсіх прысутных юнакоў і мужчын са святам і адзначу, што любы мужчына – абаронца ў сваім доме, у сваёй сям’і. Няхай гэта свята запомніцца вам надоўга. А перамога сёння за камандай першакурснікаў – за «Мажорамі»!
Усе атрымалі дыпломы і салодкія падарункі ад Івацэвіцкай раённай арганізацыйнай структуры ДТСААФ. «Крэпкія арэшкі» трошкі саступілі, але якая была падтрымка ад гледачоў, як цікава было рыхтавацца да ўсіх іспытаў. Капітан каманды Іосіф Клачко пацвердзіў, што галоўнае – гэта дух саперніцтва, драйв, а з першакурснікамі, напэўна, цяпер трэба будзе лічыцца! Яшчэ хлопцы дзякавалі за дапамогу ў падрыхтоўцы да спартыўных іспытаў Мікалаю Барысіку, выкладчыку дапрызыўнай падрыхтоўкі.
Свае падарункі атрымалі і прадстаўніцы прыгожай паловы чалавецтва – юныя зорачкі, навучэнкі прафліцэя. Творчыя нумары гледачам дарылі Лізавета Карпава, Алёна Янковіч, Сняжана Рыбак, Аляксандра Жуковіч, Лізавета Траццяк, Анастасія Янковіч, Алена Мацейка.
Мерапрыемства прайшло, а святочны настрой застаўся. Гэта ўжо традыцыя альма-матар, якую падтрымліваюць і будуць падтрымліваць і надалей.
Наталля ГЕРБЕДЗЬ, фота аўтара.