«Працуем у новых рэаліях»
Начальнік Івацэвіцкага РАУС Вадзім Пастаялка:
Новы час – новыя злачынствы. Не трэба думаць, звяртае ўвагу наш суразмоўца, начальнік Івацэвіцкага РАУС Вадзім ПАСТАЯЛКА, што мы знайшлі «ключык» і знізім колькасць кіберзлачынстваў, толькі папярэдзіўшы людзей, каб яны не адказвалі на тэлефанаванні незнаёмцаў. Калі ты ўзіраешся ў бездань, казаў
Ніцшэ, то ведай, што бездань узіраецца ў цябе. Да прыкладу, у суседняй Расіі зламыснікамі ўжо распрацаваны прыборы, які счытваюць дадзеныя з плацежных картак. Варта толькі паднесці гэты прыбор да сумачкі, у якой знаходзіцца картка.
– Не сумнявайцеся, што хутка гэта закране і беларусаў, прыйдзе да нас, – падкрэслівае Вадзім Пастаялка. – Гэта толькі пачатак, будзе яшчэ складаней. Выйсце толькі адно – абачлівасць і поўная прадуманасць кожнага свайго кроку. Віртуальная прастора, як паказаў час, цудоўнае поле дзейнасці для рознага кшталту падманшчыкаў і махляроў. І тое, што каля трэці з ліку ўсіх злачынстваў у 2021 годзе – гэта кіберзлачынствы, лепшае сведчанне: мы, міліцыя, працуем у новых рэаліях. Мы ўсе жывём у новых рэаліях.
Усім нам таксама так і не ўдалося пераламаць свядомасць у такой справе, як «гібрыдны» падман, звязаны з устаноўкай фільтраў, пластыкавых акон, з продажам нейкіх інструментаў, коўдраў сумніўных паходжання і якасці… Людзі застаюцца незадаволенымі, ім падаецца, што ў краіне няма парадку, пануе беззаконне і бязладдзе. На самай справе, толькі на нашай даверлівасці і неабачлівасці трымаецца дзейнасць гэтых міфічных кантор, якія ствараюць рэальныя праблемы чалавеку. Выйсце адно: не трэба спяшацца, важна ў спакойнай абстаноўцы правесці аналіз прапановы, што паступіла, узважыць усе «за» і «супраць». Рынак перанасычаны таварам, які сэнс спяшацца падпісваць паперы? Асабліва праблема тычыцца пажылых людзей.
– Вадзім Васільевіч, агульная статыстыка, тым не меней, сведчыць, што злачынстваў становіцца менш.
– «Класічных» злачынстваў ста
новіцца менш, калі сачыць за іх дынамікай апошніх пяці гадоў. Грамадзяне сталі больш правасвядомымі. Толькі, на жаль, не становіцца іх менш у сямейна-бытавой сферы – там, дзе злоўжываюць спіртным, дзе нярэдка ўзнікаюць бойкі паміж членамі сям’і. У пэўнай ступені нашу работу ў 2020 годзе прыпыніў каранавірус, бо было абмежаванне на наведванне сямей. Дый бальніцы ў Крывошыне і Магілёўцах змянілі профіль дзейнасці ў сувязі з пандэміяй. Зараз іх работа аднаўляецца – і мы актывізуем сваю дзейнасць у дадзеным кірунку. Іншага выйсця не бачу. Наша задача – вывесці чалавека са стану алкагольнага запою, пасля правесці сацыялізацыю – дапамагчы з працаўладкаваннем, памірыць з членамі сям’і…
– Якія ставіце задачы перад калектывам на 2021 год? Як ацэньваеце мінулы год?
– Папярэджанне кіберзлачынстваў, прафілактычная работа – найважнейшы кірунак дзейнасці! Значную ўвагу – рабоце з раней судзімымі асобамі, каб знізіць ціск рэцыдыўнай злачыннасці, бо трэцяя частка ад усіх злачынстваў – гэта справа рук раней судзімых. Важна працягнуць работу па прафілактыцы крадзяжоў – тых жа веласіпедаў, з нежылых дамоў... Бяспека дарожнага руху таксама пад пільным кантролем – найперш пешаходаў, веласіпедыстаў. Наш раён павінен стаць бяспечным для гэтай катэгорыі ўдзельнікаў дарожнага руху. Бескампрамісная барацьба з нецвярозымі вадзіцелямі – штогод затрымліваем больш за 100 такіх го
ра-вадзіцеляў. Гэта многа, калі параўноўваць з суседнімі раёнамі.
У той няпростай палітычнай сітуацыі, якая складвалася ў нашай краіне ў другой палове 2020 года, калектыў райаддзела праявіў найлепшыя якасці: мы згуртаваліся, мы не адмовіліся ад сваёй работы, нягледзячы на ціск. Мы сталі больш і лепш падтрымліваць адзін другога.
– Хто лепшыя супрацоўнікі райаддзела?
– Адзначу першага намесніканачальніка крымінальнай міліцыі Сяргея Юнкевіча, які на гэтай пасадзе нядаўна, але вызначаецца адказнасцю і прафесіяналізмам. Належным чынам выконваюць свае службовыя абавязкі Аляксандр Кікун, Аляксей Котаў, Іван Калтуневіч, Мікіта Дудзік. Не магу не адзначыць вышуковую групу – Дзмітрый Куцко і Дзяніс Сагановіч. Дэманструюць лепшыя якасці ўчастковых інспектараў міліцыі Юрый Амяляшчык, Сяргей Давідовіч, Аляксей Курыловіч, у групе па барацьбе з эканамічнымі злачынствамі Васілій Мігно, Сяргей Струнеўскі. Прафесіяналізм вызначае дзейнасць вопытных супрацоўнікаў – Ларысы Колбік, Васіля Шаўчука, Вадзіма Аполькі…
Наша служба – няпростая і складаная. Таму пажадаю падначаленым у сваёй дзейнасці вызначацца жыццёвай мудрасцю, цярплівасцю, вялікадушнасцю. Жадаю ўсім здароўя, дабрабыту, сямейнага шчасця.