«Мы маем вытворчасць, якой можна ганарыцца»

Валерый Вакульчык сустрэўся з калектывам ААТ «Івацэвічдрэў» і падзяліўся сваімі ўражаннямі ад наведвання прадпрыемства

Валерый ВАКУЛЬЧЫК, памочнік Прэзідэнта – інспектар па Брэсцкай вобласці, 4 сакавіка сустрэўся з калектывам

ААТ «Івацэвічдрэў», а таксама правёў асабісты прыём грамадзян з ліку работнікаў кампаніі. На сустрэчы прысутнічалі прадстаўнікі ўсіх структурных падраздзяленняў прадпрыемства, якое, па меркаванні памочніка Прэзідэнта, паказвае добры прыклад эфектыўнай мадэрнізацыі ў дрэваапрацоўцы.

Валерый Вакульчык яшчэ напачатку размовы з работнікамі сказаў, што яму імпануе падыход кіраўніцтва ААТ «Івацэвічдрэў» да рашэння пытанняў і яго сучасная, эфектыўная пазіцыя. Рэзультаты работы гавораць самі за сябе. Сёння прадпрыемства займаецца вытворчасцю канкурэнтаздольнай прадукцыі, з высокім дабаўленым коштам, «мы маем вытворчасць, якой можна ганарыцца», падкрэсліў Валерый Вакульчык. З добрымі вытворчымі паказчыкамі «Івацэвічдрэў» падыходзіць да святкавання свайго 100годдзя ў 2022 годзе і да 50-годдзя з дня запуску цэха ДСП, якое адзначаць сёлета.

– У вас вельмі неблагія перспектывы, – адзначыў Валерый Вакульчык.

Намеры павялічыць вытворчасць мэблі ў тры разы за бягучы год памочнік Прэзідэнта назваў галавакружнымі, але рэальнымі і абгрунтаванымі. Ён пажадаў рэалізаваць грандыёзныя планы і заверыў, што з боку кіраўніцтва краіны будзе зроблена ўсё, каб у гэтым дапамагчы.

ААТ «Івацэвічдрэў» эфектыўна выкарыстала сродкі, укладзеныя ў дрэваапрацоўку. Нягледзячы на кавід, эканамічныя цяжкасці мінулага года, яно спрацавала паспяхова, калектыў і кіраўніцтва разумеюць свае магчымасці, бачаць абгрунтаваныя перспектывы, робяць прагноз на пяць гадоў наперад. Яны стварылі добрую аснову для будучага развіцця прадпрыемства. Зыходзячы з гэтых меркаванняў і было прынята рашэнне аб стварэнні ў Беларусі дрэваапрацоўчага холдынга, кіруючай кампаніяй якога стане «Івацэвічдрэў». Тым больш, што 70% мэблевай вытворчасці краіны прыходзіцца на Брэсцкую вобласць, сказаў Валерый Вакульчык.

Акрамя сваіх уражанняў ад наведвання прадпрыемства, памочнік Прэзідэнта ў сваім выступленні кранаўся шэрагу пытанняў, якія тычацца палітычных падзей у краіне і свайго стаўлення да іх.

Пазней у інтэрв’ю журналістам ён акцэнтаваў увагу на тым, што Беларусь – сацыяльная дзяржава, таму Прэзідэнт, улады на месцах працуюць на тое, каб абараніць інтарэсы простага беларуса-працаўніка. «Менавіта ён – галоўная фігура ў нашым грамадстве, менавіта яго ў першую чаргу мы павінны пачуць», – падкрэсліў Валерый Вакульчык. Падобныя сустрэчы ў калектывах пат

рэбны і для таго, каб былі агучаны пытанні, якія пачуюць на самых розных узроўнях.

Генеральны дырэктар ААТ «Івацэвічдрэў» Аляксандр ІЛЬНІЦКІ расказаў журналістам, што прадпрыемства намеціла планы па росце, у першую чаргу, аб'ёмаў мэблевай вытворчасці. У гэтым годзе чакаецца прырост не менш чым у тры разы – да 8 млн. еўра ў год. Прадпрыемства прадоўжыла інвесціраванне ў абсталяванне на вытворчасці ДСП і мэблі. Падраздзяленні пераведзены на кругласутачны рэжым работы.

– Удзельная вага экспарту ў агульным аб’ёме прамысловай вытворчасці дасягнула 60%. Гэты ўзровень утрымліваем на працягу трох гадоў, – пакрэсліў гендырэктар. – Працуем пастаянна з 20 краінамі свету, нашы ключавыя партнёры – дзяржавы ЕС і Расія. Наш экспарт разбіты па правіле «30-30-30». Тады змены на асобных рынках не так уплываюць на работу кампаніі ў цэлым.

2020 год быў няпросты для кампаніі, яна сутыкнулася з агульнаеўрапеўскім лакдаўнам напачатку года. Але з прыходам лета прадпрыемству ўдалося ўзнавіць аб’ёмы вытворчасці і не згубіць ні выручкі, ні даходнасці, адзначыў Аляксандр Ільніцкі.

Напрыканцы сустрэчы з калектывам «Івацэвічдрэва» Валерый Вакульчык запэўніў, што яшчэ прыедзе на прадпрыемства, каб больш дэталёва азнаёміцца з яго работай, і ў работнікаў зноў з’явіцца магчымасць адрасаваць яму свае пытанні.

Вольга ШЭЛЯГОВІЧ.