Целяханы мае, Целяханы...
10 ліпеня на гасціннай целяханскай зямлі прайшло раённае свята «Целяханскі бічаўнік»
Стала традыцыяй месцам правядзення свята пасёлка абіраць фестывальную пляцоўку каля жывапіснага возера Вулькаўскага. Свята ладзілася ў сёмы раз і з’яўляецца брэндам Целяхан, а цяпер стала брэндам і раёна.
Сёлета дата яго правядзення супала са знамянальным днём – Днём вызвалення Целяхан ад нямецка-фашысцкіх захопнікаў. Менавіта, 10 ліпеня 1944 года часці 48 гвардзейскай стралковай дывізіі 20 стралковага корпуса 28 арміі ва ўзаемадзеянні з 99-й партызанскай брыгадай імя Гуляева вызвалілі мястэчка Целяханы. 186 жыхароў пасёлка не вярнуліся з фронту, 270 мірных жыхароў сталі ахвярамі фашызму, дзве тысячы жыхароў яўрэйскай нацыянальнасці былі расстраляны ў наваколлі Целяхан.
– Нашай моладзі цяжка ўявіць колькі выпрабаванняў і гора прынесла вайна, – казала старшыня пярвічнай ветэранскай арганізацыі пасёлка Святлана Крэк у сваёй прамове. – І мы не маем маральнага права забываць гэта. Сярод тых, хто вызваляў пасёлак быў і мой бацька Андрэй Хацкевіч, сакратар Целяханскага падпольнага райкама партыі…
Адзінкі засталіся ў радах ветэранаў. Гэта Зіновій Каланчук і работніца тылу Вольга Гапонік. Нізкі паклон і падзяка была выказана 17 воінам-афганцам, якія сталі мужнымі мужчынамі, з сівізною на вісках. Пад гукі Дзяржаўнага гімна Рэспублікі Беларусь Дзяржаўны сцяг права даецца ўзняць ветэрану Вялікай Айчыннай вайны Зіновію Каланчуку; лаўрэату міжнародных конкурсаў, навучэнцы Целяханскай школы мастацтваў Паліне Арцюшэнка і Ганароваму грамадзяніну Івацэвіцкага раёна Святлане Крэк.
Адметна, што целяханцы вельмі любяць свой пасёлак і адданасць гэтаму краю гучала ў кожным слове прамоўцаў. Аксана Мялік, старшыня Целяханскага сельвыканкама падкрэсліла, што «Целяханскі бічаўнік» – свята маладое, але мае свае гістарычныя прадпасылкі. Яно важнае для жыхароў Целяхан і гэтага краю. З яе вуснаў гучала падзяка хлебаробам, работнікам вытворчасці, прыватнага бізнесу, усім працоўным калектывам Целяханшчыны.
У год народнага адзінства і дзень вызвалення ад нямецка-фашысцкіх захопнікаў асабліва падкрэслівалася каштоўнасць мірнага неба, жывапіснай прыроды і сапраўднага скарбу краю – таленавітых людзей.
Сёння ў пасёлку на 76 вуліцах і правулках пражывае 4363 жыхары – і ўсе яны былі героямі гэтага свята. Асаблівая пашана гучала ў адрас тых, хто з’яўляецца жывой гісторыяй пасёлка, – 90-гадовых доўгажыхароў, якіх у Целяханах ажно 23 чалавекі, радуюцца Целяханы і 14 нованароджаным жыхарам, якія з’явіліся на свет сёлета, – за імі будучае пасёлка, прыезду выхадцаў з Целяхан, якія ўслаўляюць гэты край сваімі поспехамі і талентамі.
Радасць і ўсмешкі, сустрэчы і вітанні… У свята разгараўся эмоцыямі агеньчык любові да роднага краю. Сувязь пакаленняў, якой ганарацца местачкоўцы, праглядвалася і ў канцэртнай праграме. Тут было ўсё: духавы аркестр, гісторыя свята, пасёлка і Палесся ў дыялогу дзяцей і цёткі Ганны пад гукі жалейкі, выхад знаці былых часоў пад гукі паланэза, песні, прысвечаныя Целяханам… А колькі гасцей-артыстаў прыехала на свята, і ўсе такога ўзроўню, што толькі атрымлівай асалоду: «...Спадніцы пашылі, паселі ў машыны, ехалі, спявалі, сябе не шкадавалі. А адкуль мы? Адтуль, дзе азёры глыбокія, а дзеўкі сінявокія…» – віталі заўзятым кірмашом Святавольскія і Амяльнянскія артысты, а за імі «Сяброўкі» з Івацэвічаў, целяханскія зоркі, віртуоз ігры на балалайцы Аляксандр Варанішча, народная эстрадная студыя з Ляхавічаў, рэтра канцэрт, святочная дыскатэка і фаер-шоу.