Ушаноўвалі кааператараў
Шматлюдна было ў Івацэвіцкім ГДК 9 ліпеня – з нагоды прафесійнага свята тут ушаноўвалі лепшых работнікаў сістэмы кааперацыі раёна. Больш за сотню ўзнагарод рознага ўзроўню ўручалі ганаровыя госці: намеснік старшыні Івацэвіцкага райвыканкама Наталля Аляхновіч і намеснік старшыні Брэсцкага аблспажыўсаюза Ларыса Казлова, а таксама старшыня праўлення Івацэвіцкага раённага спажывецкага таварыства Алена Куратнік.
Кіраўнік райста першай звярнулася да прысутных і, акрамя традыцыйных слоў падзякі калегам ды пажаданняў развіцця і росквіту, распавяла пра гонар галіны –лепшыя філіялы і поспехі таварыства ў цэлым. Сёння ў Івацэвіцкім райста працуюць 1080 чалавек, у раёне функцыянуюць 124 магазіны, 13 кропак грамадскага харчавання, хлебапякарня, каўбасны і рыбны цэхі, у аўтапарку – больш за 100 адзінак тэхнікі. Штомесяц райста рэалізуе тавараў на 4 млн руб., сярод якіх 240 тон хлеба, 15 тон каўбасных вырабаў, 50 тон паўфабрыкатаў і многае іншае. Прадукцыя райспажыўтаварыства ідзе на экспарт у Казахстан, Літву, Польшчу і Расію.
Ужо два гады запар Івацэвіцкае райста – лідар у вобласці па выніках работы па агульнагаспадарчай дзейнасці, у нарыхтоўчай і гандлёвай дзейнасці. А па нарыхтоўках і ў транспартнай галіне – лепшае ў Белкаапсаюзе. Паспяхова працуюць філіялы «Каапнарыхтпрам», «Камбінат кааператыўнай прамысловасці», «Аўтабаза».
– Дзякуючы зладжанай рабоце ўсяго калектыву забяспечаны прырост асабістых абаротных сродкаў і прыбытку, – адзначыла старшыня праўлення. – Больш за 900 тыс. руб. інвестыцый накіраваны на паляпшэнне матэрыяльна-тэхнічнай базы аб’ектаў, мадэрнізацыю вытворчасці, абнаўленне аўтапарка.
Алена Куратнік шчыра дзякавала за падтрымку і дапамогу ў рабоце кіраўніцтву райвыканкама, Брэсцкага аблспажыўсаюза, РАУС і РАНС, аддзяленняў «Беларусбанка» і «Белаграпрамбанка».
Затым, пасля віншаванняў ганаровых гасцей, пачалася цырымонія ўзнагароджвання. «ІВ» друкаваў імёны тых, каго за плённую працу сёлета адзначыў райвыканкам і райсавет.
А вось «Ганаровыя знакі» Белкаапсаюза атрымалі: калектыў Івацэвіцкага райста – «За высокія дасягненні ў нарыхтоўчай дзейнасці» (старшыня праўлення – А. М. Куратнік) і філіял «Аўтабаза» – «За высокія дасягненні ў транспартнай галіне» (дырэктар – У. А. Жыгар). Ганаровае званне Белкаапсаюза «Чалавек года» ў намінацыі «Лепшы бухгалтар» прысуджана галоўнаму бухгалтару Івацэвіцкага райста Галіне Казак.
Нагрудным Знакам Белкаапсаюза «40 гадоў працоўнай дзейнасці ў спажывецкай кааперацыі Беларусі» ўзнагароджаны вадзіцель
філіяла «Аўтабаза» Леанід Бараноўскі. Нагрудным Знакам Белкаапсаюза «30 гадоў працоўнай дзейнасці ў спажывецкай кааперацыі Беларусі» – дырэктар філіяла «Лотас» Галіна Дзянішчык.
Граматай Праўлення Белкаапсаюза адзначаны ветэрынарны ўрач філіяла «Каапнарыхтпрам» Анатоль Пакрышка. Ганаровымі граматамі праўлення Брэсцкага аблспажыўсаюза і Прэзідыума абкама прафсаюза работнікаў кааперацыі ўзнагародзілі: вадзіцеля аўтамабіля філіяла «Аўтабаза» Міхаіла Крывецкага; начальніка ўчастка па вытворчасці хлебабулачных вырабаў «Камбіната кааператыўнай прамысловасці» Іну Герштову; прадаўца магазіна ТПП в. Амяльная Целяханскага філіяла Марыну Агрэніч; прадаўца магазіна ТПП в. Дабромысль філіяла «Аптовая база» Таццяну Каласоўскую; вадзіцеля аўтамабіля філіяла «Аўтабаза» Юрыя Сярко. Больш за 80 Грамат праўлення Івацэвіцкага райста ўручыла работнікам яго старшыня. Сапраўдным падарункам для кааператараў раёна стаў канцэрт вядомага беларускага спевака Сашы Нэма.
Падрыхтавала Вольга ШЭЛЯГОВІЧ.