У нас ужо два «стабальнікі»

Пакуль два вучні ў раёне здалі тэсты на максімальныя 100 балаў. Такога «потолка» па прадметах дасягнулі нашы залатыя медалісты і алімпіяднікі Станіслаў

Ратахін з ДУА «СШ №3 г. Івацэвічы» і Яна Савіна з ДУА «СШ №1 г. Івацэвічы».

Ужо 297 балаў у гэтай уступнай кампаніі мае Станіслаў Ратахін па выніках трох тэстаў – беларускую мову і грамадазнаўства ён здаў на максімальны бал, 97 балаў Стас атрымаў па гісторыі Беларусі. Яшчэ 100 балаў у агульную скарбонку юнака дадаў выдатны атэстат. Такім вынікам паспрыялі таксама ўдзелы ў розных этапах алімпіяд па прадметах. У 2020/2021 навучальным годзе Станіслаў Ратахін стаў дыпламантам III ступені на трэцім этапе рэспубліканскай алімпіяды па грамадазнаўстве, пераможцам другога этапу рэспубліканскай алімпіяды па беларускай мове і літаратуры, атрымаў дыплом III ступені завочнай абласной алімпіяды па журналістыцы.

Яна Савіна набрала 100 балаў па прадмеце «Руская мова». Медалістка з’яўляецца членам маладзёжнага парламента. І ў 2020/2021 навучальным годзе Яна вярнулася з ІІ этапу рэспубліканскай алімпіяды па англійскай мове з дыпломам ІІ ступені. Дзяўчына – дыпламант раённага этапу Міжнароднай алімпіяды Саюзнай дзяржавы «Расія і Беларусь: гістарычная і духоўная супольнасць».

Як адзначылі ў аддзеле па адукацыі райвыканкама, гэты год асабліва багаты па колькасці стабальнікаў. Так, у 2019 годзе мы радаваліся за выпускнікоў ДУА «Ліцэй Івацэвіцкага раёна» і ДУА «СШ №4 г. Івацэвічы», яны набралі максімальныя балы па англійскай і нямецкай мовах. У мінулым жа годзе 100 балаў не набраў ніхто.

Дарэчы, мы яшчэ можам разлічваць на добрыя навіны наконт балаў па тэсціраванні, не па ўсіх прадметах яшчэ ёсць вынікі. Тым больш, да канца гэтага тыдня распісаны і рэзервовыя дні для здачы тэстаў.