Сваю оду я спяваю табе, родная вёска
Міхнавічам – 505
У нядзелю, 4 ліпеня, на дзіцячай пляцоўцы ў цэнтры Міхнавіч сабраліся вяскоўцы і госці свята. Пад гукі фанфар выходзіць у народным касцюме вядучая Алена Цыбульская, загадчыца аўтаклуба ДУК «Івацэвіцкая раённая клубная сетка», і пачынаецца ўрачыстая дзея.
Да свята была праведзена значная падрыхтоўка, каб сцэна была прыгожай, каб у людзей была магчымасць палюбавацца работамі аматараў народнай творчасці, каб былі кветкі, падарункі, пірагі і ўсе адпачылі ад душы. Дарэчы, падарункі былі розныя, у ліку іх і падпіска на раённую газету. Сапраўдны парад творчасці атрымаўся, і было святочна, радасна ад маштабу таго, што адбывалася. Прыўзняты настрой пакінулі ў душы кожнага гледача вясёлыя беларускія найгрышы і песні ў выкананні самадзейных артыстаў Амяльнянскага, Мілейкаўскага, Гошчаўскага СДК, Зеленаборскага СК і калектыву аматарскага аб’яднання «Час і мы».
Вітаў вяскоўцаў старшыня Стайкаўскага сельвыканкама Мікалай Басалай і стараста вёскі-юбіляркі Марыя Белая падчас адкрыцця свята. Дарэчы ім, як і артыстам, вяскоўцы засталіся асабліва ўдзячнымі за добрую арганізацыю свята.
Вядома, кожная вёска мае сваю цікавую гісторыю, і калі, як не ў юбілей, расказаць нашчадкам пра яе. Бібліятэкар Стайкаўскай сельскай бібліятэкі Галіна Суханосік гэта цудоўна зрабіла, а потым парадавалі ўсіх душэўным выкананнем балад Віктар Такарчук і Сяргей Клімуш.
За гады Вялікай Айчыннай вайны на тэрыторыі Стайкаўскага сельсавета сталі ахвярамі фашысцкіх дзеянняў 120 чалавек, у ліку якіх і жыхары в. Міханавічы, памяць аб якіх была ўшанавана мінутай маўчання.
Але вёска адрадзілася, і на свяце ўшаноўвалі таленавітых жыхароў – тых, хто жыве на гэтай зямлі і праслаўляе сваю малую Радзіму. Гэта людзі працоўнай славы, паважанага мудрага ўзросту, пенсіянеры, работнікі розных сфер дзейнасці, шматдзетныя, маладыя і са стажам сем’і, бабулі і супер-бабулі, доблесныя мужчыны, дзеці і падлеткі, моладзь, усе, хто прыехаў адпачываць у вёску, дачнікі і майстры народнай творчасці, удзельнікі «колішняй міхнавіцкай» самадзейнасці, юбіляры, гаспадары і гаспадыні – усім слава і гонар, і апладысменты былі на свяце. Каб пералічыць усіх, не хопіць і газетнай старонкі.
Работнікам культуры і бібліятэк, сябрам-калегам, работнікам гандлю, аўтамагазіну-аўталаўцы, якія прыехалі на дзень вёскі, мясцоваму дэпутату Анатолію Трафімчыку – гучала падзяка. І давалася слова ганаровым гасцям свята. Змястоўнымі і кранальнымі былі выступленні ўраджэнцаў вёскі Міхнавічы: галоўнага рэдактара раённай газеты «Івацэвіцкі веснік» Таццяны Дылюк, паэта Аляксея Белага, які пражывае ў Баранавічах, унучкі пісьменніка Міколы Купрэева.
Дзятве таксама было весела на свяце – можна было пракаціцца на возе з конікам. Да вечара гудзела вёска бы вулей і ўсім было добра і цікава.