«Нам на работу па паветры ісці?»
Шлях на работу ідзе праз аўтадарогу
М-1, іншага шляху няма. Ісці па трасе нельга па Правілах дарожнага руху, даішнікі штораз спыняюць. Асабістага аўто таксама няма, таксісты просяць за паездку з Івацэвіч да кафэ «Вітаем Вас» ні многа ні мала 20 рублёў. Такія «залатыя» паездкі не па кішэні. Усё. Кола замкнулася. Як дабірацца на работу – пытанне?..
На мінулым тыдні ў рэдакцыі раздаўся званок. На тым провадзе была ўсхваляваная работніца кафэ «Вітаем Вас», якая агучыла, па яе словах, вось такую праблему амаль усяго калектыву.
– Мы ходзім на работу, па сутнасці, па трасе М-1, кафэ працуе з 7 гадзін раніцы і да 23.00 у буднія дні і да 2 гадзін ночы ў выхадныя і святочныя. У нас невялікі калектыў на змене працуюць па 2-3 чалавекі, гэта пераважна жанчыны, нехта ідзе на змену з Яглевіч, нехта – з райцэнтра. Не ва ўсіх ёсць аўто, таксісты дзяруць вялікія грошы. Такія траты мы не пацягнем. Дарожкі тут няма, а ісці па трасе нельга і небяспечна, хоць ты па паветры на работу дабірайся…
Далей была яшчэ доўгая шчырая размова з жанчынай і нашай чытачкай. Яна расказала, што даішнікі ўсё часцей спыняюць яе і калег, хоць дзяўчаты «экіпіруюцца» флікерамі і ліхтарыкамі, але гэта не пазбаўляе іх ад адказнасці за парушэнне ПДР. І тыя ж інспектары ДПС маюць рацыю, калі спыняюць парушальнікаў.
– Гэтыя грамадзяне парушаюць п. 131.1 ПДР, па якіх пешаходам, веласіпедыстам, уладальнікам мапедаў, гужавых павозак забараняецца рухацца па аўтамагістралях, – адзначае інспектар ДПС Дзмітрый Юдзік. – Пакаранне тут не самае строгае – папярэджанне на першы раз і штраф у 1 базавую на другі, аднак самы большы матыватар тут – інстынкт самазахавання. Рухацца ў цемры па аўтамагістралі, дзе нясуцца аўто і бальшагрузы з хуткасцю ў 100 і 120 км – гэта кожны раз так моцна жартаваць з лёсам. Ігнараваць такія парушэнні мы не можам, гэта стварае небяспечную абстаноўку на дарогах і ў рэшце рэшт, можа скончыцца смерцю. Дарэчы, падчас рэйду 13 студзеня мы даставілі да горада і саставілі пратаколы на трох нецвярозых пешаходаў, якія ноччу вярталіся з кафэ «Новый свет».
Рашучасці ў вырашэнні праблемы калектыву дадаў і выпадак з калегай. 26 снежня повар кафэ, якая рухалася дадому на веласіпедзе, патрапіла ў ДТЗ. Вадзіцель пакінуў яе на дарозе і скрыўся з месца здарэння. На момант падрыхтоўкі публікацыі жанчына яшчэ знаходзілася на лячэнні ў райбальніцы. Увесь боль у гэтым пытанні мы адчулі і падчас размовы з калектывам у кафэ, людзі просяць пабудаваць пешаходную дарожку, аднак, кошт пытання немалы. Гэты ўчастак дарогі знаходзіцца на абслугоўванні ў філіяла ДЭУ-23 РУП «Брэстаўтадар», галоўны інжынер Ілья Цімашэвіч расказаў, што на 2024 год запланаваныя бягучыя рамонтныя работы на аўтадарозе М-1, але без будаўніцтва пешаходнай дарожкі. Увогуле, кошт пытання дарожкі даўжынёй каля кіламетра прыкладна 40-50 тысяч рублёў.
Найбольш рэальным выйсцем уяўляецца арганізацыя падвозу работнікаў да кафэ «Вітаем Вас». Так, менавіта гэты варыянт прапанаваў сваім супрацоўнікам і дырэктар філіяла «Камбінат кааператыўнай прамысловасці» Івацэвіцкага райспажыўтаварыства Ігар Касцюк:
– Справа ў тым, што раніцай наша машына з таварам вязе на работу і жадаючых работнікаў. Гэта мы практыкуем ужо не першы год, была праблема з адваротным шляхам у цёмны час. Я прапанаваў дзяўчатам прадастаўляць у бухгалтэрыю чэкі за карыстанне таксі, і мы без праблем пакрывалі б расходы на транспарт. Такая практыка з работнікам з Гошчава ў нас ужо ёсць. Просьбу калектыву мы пачулі і разгледзелі. Сёння ўжо вядзём перагаворы з фірмай, якая прадастаўляе паслугі таксі, плануем заключыць доўгатэрміновы дагавор. Усе жадаючыя будуць дабірацца на работу на машыне. Так будзе правільна, так будзе бяспечна для нашых людзей.
Добра, калі кіраўніцтва пачула просьбы і раздзяліла хваляванне работнікаў, на жаль, штуршком для гэтага стала аварыя. Добра, што ўсе жывыя, але яшчэ не зусім здаровыя. Спадзяёмся, дагавор будзе заключаны хутка і надоўга, ды нікому больш не прыйдзецца хадзіць на працу з ліхтарыкамі і трапляць у поле зроку даішнікаў.
Кіра ПРАЛЕСКОВА.