І ў святы – на сцэне

Узнагароды, кветкі, песні і танцы – напярэдадні Дня работнікаў культуры віншаванні прымалі тыя, каму прывычней самім стаяць на сцэне і дарыць радасць гледачам і слухачам.

– Прафесія работніка культуры складаная, бо, дорачы людзям свята і добры настрой, вы самі не маеце магчымасці адпачыць. Нават у сваё прафесійнае свята вы знаходзіцеся на сцэне. Дзякуючы вашаму таленту, натхненню, працавітасці і прафесіяналізму, Астравеччына займае пачэснае месца ў культурным жыцці Гродзеншчыны, – адзначыў намеснік старшыні Астравецкага райвыканкама Віктар Свіла. – Упэўнены, што ў кожным з вас закладзены вялікі патэнцыял і вы і надалей будзеце радаваць нас сваёй працай, спрыяць захаванню культурнай спадчыны і традыцый раёна, праслаўляць яго ўнікальнасць і прыгажосць.

Ад раённага выканаўчага камітэта Віктар Свіла ўручыў Ганаровыя граматы Вользе Валадзько і Мікалаю Сафранкову, Падзячныя лісты – Наталлі Ярашэвіч і Таццяне Клышко, ад раённага Савета дэпутатаў Ганаровыя граматы – Алене Малышавай і Аляксандру Юргелянцу, Падзячныя лісты – Ганне Якубцэвіч і Надзеі Вайцяховіч.

Віншаванні, падарункі і ўзнагароды ў перадсвяточны дзень работнікам культуры адрасавалі старшыні раённых арганізацый ГА БРСМ Віялета Алексеявец, РГА «Белая Русь» Ірына Раткевіч і ГА «Беларускі саюз жанчын» Наталля Баніцэвіч, старшыні раённага аб’яднання прафсаюзаў Расціслаў Бразінскі і савета ветэранаў Расціслаў Герт, начальнікі РАНС Віталь Рыбак і РАУС Дзмітрый Місюк, выконваючая абавязкі загадчыка сектара культуры Інга Купрэвіч.

Падарункі ад старшыні прафсаюза работнікаў культуры Наталлі Ачарэтавай атрымалі маладыя спецыялісты.