Як Апэшка зноў у сад трапіла – яблыневы
Сябры мае, даўно мы з вамі не сустракаліся, не размаўлялі пра жыццёбыццё… Часу не стае… Напэўна, я ўжо дарослая стала – гэта ж у нашых мамаўтатаў, дзядзяўцёцяў ніколі ні на што часу не хапае…
Зараз я вам раскажу, дзе была на мінулым тыдні. Ніколі не здагадаецеся… У яблыкі ездзіла! Ведаеце, колькі іх там шмат?! Пытаеце, дзе? У варнянскім садзе!
У мінулым годзе я там ужо была. Сёлета мае бацькі-журналісты з пачатку верасня туды наведваюцца, дапамагаюць калгаснікам ураджай збіраць. Вось і я папрасілася – узялі.
Скажу вам па сакрэце: мне гаспадыня саду Ірына Бярнардаўна расказала, што сёлета яблыкаў вырасла менш, чым летась. Ва ўсім халаднаватая вясна вінаватая. Але калгаснікі плануюць сабраць немалы ўраджай – каля 900 тон, калі, вядома, вы ім дапаможаце.
Без дапамогі астраўчан у садзе не абысціся – я ў гэтым упэўнілася. Там усяго 10 жанчын і 4 мужчыны разам з Ірачкай Бярнардаўнай шчыруюць. Усе цудоўныя працаўнікі, адказныя, усё ўмеюць, але ж так іх мала. А калі за працу ўзяцца вялікай талакой, справа спорыцца будзе і хутка ўвесь ураджай збярэцца!
Скажу па праўдзе, яблыкі я люблю, а за кожны працоўны дзень тут цяпер 20 кілаграмаў можна ўзяць самых розных сартоў! «Беларускае салодкае», «заслаўскае», «памяць Сюбаравай», «імант», «надзейнае»… – усе нават і не запомніла. І ўсе дрэўцы нашы, беларускай селекцыі. А яблычкі – прыгожыя, наліўныя, смачныя…
Ірына Бярнардаўна мне расказала, што сад быў закладзены ў 2011 годзе – тады тут былі пасаджаны першыя дрэўцы. Атрымліваецца, што некаторым ужо па 9 гадоў. І толькі ў 2015 годзе завяршылі пасадку яблынек – сад займае ажно 100 гектараў!
– Вы б пабачылі, якая тут прыгажосць вясной, калі дрэвы цвісці пачынаюць! – казала Бярнардаўна дзяўчатам, якія дапамагалі нам збіраць ураджай. – Прыязджайце да нас на фотасесіі – прыгожыя здымкі атрымаюцца.
А я вам так скажу: восенню тут не менш прыгожа! І фотасесію таксама можна правесці – мае журналісты праверылі. Нічога такія здымкі атрымаліся! Аднак не гэта галоўнае – яблыкі ж такія смачныя і карысныя! Іх абавязкова трэба сабраць. Таму далучайцеся да нашай талакі.
Дарэчы, Ірачка Бярнардаўна ўсіх запрашае. Так і сказала: «Без вашай дапамогі, мы не справімся! Прыязджайце! Будзем рады вас бачыць!»
Я на наступным тыдні зноў паеду. Гайда са мной!
Ваша Апэшка.