З аглядкай на надвор’е
Азеляніцелі астравецкай жыллёва-камунальнай гаспадаркі да высадкі кветак на гарадскія клумбы даўно гатовы. Чакае «пераезду» і расада. Вось толькі надвор’е перашкаджае такой прыгожай справе.
– Плошчы гарадской тэрыторыі, якую мы азеляняем, павялічваюцца, – расказвае інжынер садова-паркавай гаспадаркі РУП ЖКГ Ганна Свірская. – Таму павялічваем і колькасць расады ў цяпліцах. Сёлета каля 30-35 тысяч штук гатова да высадкі ў адкрыты грунт. Хочам паспрабаваць вырасціць яшчэ больш.
Як бы ні хацелася камунальнікам пачаць упрыгожанне горада, яны кіруюцца ў першую чаргу надвор’ем, тэмпературай глебы і сортам раслін, якія адрозніваюцца тэрмінамі цвіцення і вынослівасцю. Таму сёлета азеляніцелі не спяшаюцца з высадкай кветак на гарадскія клумбы – будзе шкада, калі расада змерзне.
– Выхад на кветнікі плануем не раней сярэдзіны мая, калі пацяплее, – тлумачыць інжынер. – Але хвалявацца, што Астравец застанецца без яркіх вясенніх колераў на Дзень Перамогі, не трэба – ужо цягнуцца да сонца першацветы, хутка зацвітуць цюльпаны.
–У гэтым годзе больш увагі мы надаём вертыкальнаму азеляненню, – раскрывае сакрэты Ганна Пятроўна. – Апошнія гады гэта тэндэнцыя праглядваецца ў многіх гарадах. Акадэмічныя клубмы застануцца – на помніках ці ў месцах, дзе ёсць нейкія абмежаванні – да прыкладу, пліткай або тратуарам. Вертыкальныя канструкцыі больш пышныя і бачны здалёк. Да таго ж змяншаюць колькасць сапсаванай расады: як правіла, такое здараецца пасля выгула ў кветніках дамашніх пітомцаў. Канечне, у нас «прыкапаны» стратэгічны запас на замену загінулых або скрадзеных раслін, аднак і ён абмежаваны.
Традыцыйныя аксаміткі, пеларгонія, браткі, з дзясятак сартоў бягоніі, каны, амарант, герань, петунія, з новых вертыкальных – іпамея батат, традысканцыя, ціхондра – гэтыя і не толькі расліны змогуць знайсці на гарадскіх вуліцах аматары квітнеючай прыгажосці.