Зазвінелі зажынкі над гудагайскім полем
На Астравеччыне пачалося жніво. Першымі на хлебную ніву выйшлі жнеяры КСУП «Гудагай». Больш за 3 600 гектараў збожжавых і зернебабовых чакаюць свайго часу. Дванаццаць камбайнаў будуць працаваць на іх абмалоце.
У раёне напачатку жніва праводзілі зажынкі шмат гадоў назад. Сёлета па ініцыятыве старшыні Астравецкага раённага выканаўчага камітэта Ігара Шалудзіна гэтая добрая традыцыя адрадзілася.
Да пачатку ўрачыстасці першыя каласкі сярпом зрэзаў Іван Жытковіч, загадчык раслінаводчага ўчастка, з якога і распачалася сёлетняя ўборка збожжавых. Усё жыццё Іван працуе ў сельскай гаспадарцы на адным месцы, і нават прозвішча ў яго сімвалічнае – жніўнае.
Абрад зажынак правялі супрацоўнікі раённай культуры, якія ўручылі сноп і каравай Ігару Шалудзіну.
У «Гудагаі» жніво пачалося з Богам. Пробашч астравецкай парафіі Святых Космы і Даміяна, ксёндз-канонік Юзаф Багдзевіч памаліўся за хлебаробаў і ўраджай, удзяліў благаславенне і акрапіў святой вадой камбайнераў, вадзіцеляў і тэхніку.
З пачаткам жніўнай кампаніі гаспадароў павіншаваў старшыня райвыканкама:
– Жніво – гэта вынік працы ўсяго года. Вельмі спадзяюся, што сёлета ўраджай будзе не горшым, чым летась, – хоць у гэтым годзе надвор’е выпрабоўвала вяскоўцаў. Веру, што вынікамі ўборкі мы будзем задаволены. Жадаю, каб гэты важны этап вы прайшлі без страт.
Да віншаванняў далучыўся і дырэктар КСУП «Гудагай» Эдуард Садоўскі.
– Уборка – гэта свята, – лічыць кіраўнік гаспадаркі. – Мне было вельмі прыемна бачыць вашы ўсмешкі пасля таго, як вы даведаліся, што сёння пачынаем малаціць. З Богам!
…З ускрайку ячменнага поля дружна рушылі 4 камбайны – і пачалі свой шлях да Яго Вялікасці Хлеба.
У добры шлях, хлебаробы Астравеччыны! Як кажуць, блаславі, Божа, жыта зжаці і надвор’е добрае даці!