Пацяплела!
Адно з асноўных пытанняў, што хвалюе людзей у асенне-зімовы перыяд: ці цёпла ў дамах, кватэрах, офісах. Вучні і настаўнікі Рытанскай школы адказваюць на гэтае пытанне радасна: так! І дадаюць: нашмат цяплей, чым было ў мінулыя гады. Уся справа ў пераводзе рытанскай кацельні з дроў на паліўныя пялеты.
Але, напэўна, больш дарагое паліва адмоўна адбілася на эканамічным стане уладальнікаў кацельні?
З гэтым пытаннем мы звярнуліся да галоўнага інжынера РУП ЖКГ Валерыя Грышкевіча.
– Наадварот: перавод невялікіх вясковых кацельняў на паліўныя пялеты, нягледзячы на большы іх кошт у параўнанні з дрывамі, дазволіў знізіць сабекошт гігакалорыі цяпла ў разы, – патлумачыў Валерый Станіслававіч. – У невялікіх вёсках, дзе мала спажыўцоў ад цэнтральнай кацельні, кошт цяпла для нас, яго вытворцаў, неапраўдана высокі. У той жа Рытані кацельня ацяпляе толькі школу – і пры гэтым нам трэба было трымаць некалькі качагараў. Заработная плата ў сабекошце гігакалорыі цяпла складала да 70%. Перавод кацельні на пялеты і, адпаведна, на работу ў аўтаматычным рэжыме і эканомія сродкаў на заработную плату дазволіць знізіць сабекошт цяпла і палепшыць эканоміку прадпрыемства.
Па словах галоўнага інжынера, рытанская кацельня не адзіная, якая ў гэтым ацяпляльным сезоне будзе працаваць у новым рэжыме. На паліўныя пялеты пераведзены таксама кацельні ў Падольцах, Кямелішках, Спондах, на газ – у Гервятах.
Трэба думаць, новаўвядзенне дапаможа забіць двух зайцоў: у школах і ў іншых спажыўцоў пацяплее, а расходы камунальнікаў зменшацца.