Падрастае змена!
У аграпрамысловым комплексе раёна працуе шмат моладзі.
Больш таго, юнакі і дзяўчаты свядома выбралі спецыяльнасці сельскагаспадарчага профілю. У іх ліку і памочнік брыгадзіра раслінаводчага ўчастка №2 КСУП
«Гудагай» Арцём
Вішнеўскі.
Для аграрыяў вясна – не менш напружаная за лета.
Хоць у апошні час прынята адыходзіць ад тэрміна «зона рызыкоўнага земляробства», тым не менш, у нашым паўночным рэгіёне надвор’е значна ўплывае на будучы ўраджай. З маладым аграномам «перасякліся» ў аграгарадку Палушы ля кафэ «Эдэм» КСУП «Гудагай». У працоўныя абавязкі памочніка загадчыка ўчастка ўваходзіць і дастаўка харчавання механізатарам на поле.
– Гэтая пасяўная для мяне першая самастойная, – уводзіць у курс спраў Арцём. – Я мясцовы, з Філіпан. У старэйшых класах вырашыў стаць аграномам. Пасля школы паступіў у Навагрудскі дзяржаўны аграрны каледж. Цяпер гэту навучальную ўстанову перайменавалі, таму што дадалося шмат новых спецыяльнасцей. Вучыцца падабалася – сярэдні бал 8,6. Актыўна ўдзельнічаў у розных конкурсах, аглядах, спаборніцтвах. Каманда каледжа заняла 2 месца ў рэспубліканскім конкурсе аграмайстэрства. Тады і зразумеў, што не памыліўся з выбарам прафесіі.
Пасля Навагрудка малады чалавек вярнуўся на радзіму. Першыя крокі ў прафесію рабіў у КСУП «Гудагай». Праз тры тыдні Арцёма забралі ў армію, служыў у танкавых войсках у Слоніме. У студзені пасля дэмабілізацыі малады аграном працягнуў работу ў КСУП «Гудагай».
– Раслінаводчы ўчастак №2, якім загадвае брыгадзір Наталля Безляповіч, – гэта землі ў раёне Палушаў, Смілгоў, Дравянік, Градаўшчызны, – расказвае Арцём Вішнеўскі. – Паляводаў хваліў бы штодзень – малайцы яны ў нас. Ды ўвогуле калектыў КСУП «Гудагай», як і наш шэф, – цудоўны. Эдуард Іванавіч ідэальна «наразае» задачы – работа ў палях кіпіць. Мне пакуль не хапае вопыту, але заўсёды ёсць з кім параіцца. Удзячны за дапамогу памочніку брыгадзіра раслінаводчага ўчастка №1 Леанарду Міклісу, галоўнаму аграному Андрэю Ненартовічу, намесніку дырэктара Андрэю Вінчу і многім іншым.
На развітанне пацікавілася ў тэхнолага палёў, якую культуру ён любіць найбольш і ці збіраецца заставацца ў сельскай гаспадарцы раёна.
– Напэўна, рапс – ён найбольш эканамічна выгадны.
Але дакладна адказаць на пытанне змагу толькі пасля жніва, – усміхаючыся, працягвае малады чалавек. – Думаю заставацца ў КСУП «Гудагай». У планах атрымаць вышэйшую адукацыю, каб замацавацца ў гэтай гаспадарцы.