БЫЛЫХ НЕ БЫВАЕ
Калі пра людзей, якія не адно дзесяццігоддзе аддалі рабоце і пайшлі на заслужаны адпачынак, памятаюць – гэта дарагога каштуе.
– У вобласці праходзіць дэкада «Залаты ўзрост». Як бы ні называлі гэты перыяд – элегантным, шаноўным – тым не менш, гэта час вопыту. Вы паважаныя людзі. Са святам жыцця! І няхай яно будзе залатым! – прывітала аксакалаў сельскай гаспадаркі Ірына Шляхтун. – Таксама хачу прыгадаць кіраўнікоў і спецыялістаў, якія праўдай, верай, жыццём служылі роднай зямлі і якіх, на жаль, ужо няма побач з намі: Часлава Рынкевіча, Мар’яна Шагуна, Аляксея Шафарэвіча, Рамана Камінскага, Тамары Зарэцкай, Анатоля Болагава, Станіслава Івашкі, Івана Масальскага, Мікалая Севасцьяна, Яўгена Кухарчыка, Яніны Новік і многіх іншых.
Хвілінай маўчання ўшавалі памяць былых калег прысутныя.
– Працаваць мне давялося толькі з некаторымі з вас. Але і вы, і мы зараз робім адну справу: займаемся сельскай гаспадаркай і забяспечваем харчовую бяспеку краіны, – адзначыў першы намеснік старшыні райвыканкама Іван Карніла. – Астравец лічыцца атамнай сталіцай Беларусі, але наш раён па-ранейшаму застаецца аграрным. Асноўную валавую прадукцыю забяспечвае сельская гаспадарка. Мы займаем 6-ю пазіцыю па вытворчасці малака з 17-ці раёнаў вобласці. Нам ёсць чым ганарыцца: рэалізацыя малака за суткі дасягае 200 тон. Да канца года плануем надаіць 7 тысяч кілаграмаў ад каровы, а КСУП «Гудагай» плануе выйсці на 9 тысяч пры 3-тысячным пагалоўі. Гэтая гаспадарка – лакаматыў малочнай вытворчасці раёна. Ганарымся такімі кіраўнікамі, як Эдуард Іванавіч. Моцныя лідары і ў КСУП «Гервяты», і ў РУП «Астравецкі саўгас «Падольскі». У апошняй гаспадарцы, дзякуючы маладому дырэктару Дзянісу Кірпе назіраецца добры тэмп росту вытворчасці: за пяць гадоў свайго кіраўніцтва яна павялічылася ўдвая. Лічу, што ўсіх гэтых поспехаў і дасягненняў не было б без той базы, якую вы заклалі ў свой час. Дзякуй за працу. Здароўя, радасці і бадзёрасці на доўгія гады!
Памятныя сувеніры і Падзякі за шматгадовую плённую працу ў раённай сельскай гаспадарцы ад райкама прафсаюза работнікаў АПК і ўпраўлення сельскай гаспадаркі і харчавання атрымалі былыя старшыні калгасаў Мечыслаў Валуевіч («Шлях Леніна»), Вячаслаў Адахоўскі («Радзіма»), Леанід Шкуратаў («Савецкая Беларусь»), Валянцін Балабановіч (імя Мічурына), Віктар Ярмак (імя Калініна), Адам Горбаль («Савецкая Беларусь»), дырэктар сельгастэхнікі Мікалай Харкуноў, дырэктар Астравецкага ПМС
Здзіслаў Адынец, намеснік начальніка райсельгасхарчу па эканоміцы Наталля Волклеановіч, начальнік райсельэнерга Мар’ян Краснік, галоўны спецыяліст райсельгасхарчу Гелена Вільбік, галоўны аграхімік раёна
Таццяна Масальская, галоўны спецыяліст райсельгасхарчу Анатоль Ражко, кіраўнік фермерскай гаспадаркі «Світанак-л»
Часлаў Лабачэўскі, галоўны спецыяліст райсельгасхарчу Галіна Мілэйша, намеснік галоўнага ветурача Рышард Турчыновіч, інспектар дзяржтэхагляду Сяргей Паляшчук, галоўны спецыяліст упраўлення
Галіна Ждановіч, галоўны бухгалтар райсельгасхарчу Тэрэса Садоўская, галоўны спецыяліст райсельгасхарчу Святлана Чарняўская, галоўны інжынер райсельгасхарчу
Уладзімір Раманоўскі.
Старшыня райкама прафсаюза АПК Юрый Адула паведаміў, што ветэраны працы могуць аздаравіцца ў санаторыях, а таксама папрасіў, каб не саромеліся звяртацца да сваіх паслядоўнікаў з падказкамі і парадамі. Ад начальніка ЦБП №428 «Белаграпрамбанка» Андрэя Гладкага прысутныя даведаліся пра паслугі для пенсіянераў.
Некалькі гадоў назад МТК «Кярняны» адышоў КСУП «Гудагай» – і яго нястомны кіраўнік са сваёй камандай узяўся за справу. Хутка побач са старой фермай выраслі новыя жывёлагадоўчыя памяшканні, даільная зала і тэхналагічныя ёмістасці для захоўвання травяністых кармоў памерам з палавіну футбольнага поля.
– Аб’ём адной сянажна-сіласнай траншэі дасягае 4-х тысяч тон. Учора, напрыклад, заклалі 2 200 тон. Зазначу, што толькі адзін кормаўборачны камбайн «Ягуар» за змену «набівае» тысячу, – расказаў Эдуард Іванавіч.
Многія былі прыемна здзіўлены аб’ёмамі сучаснай корманарыхтоўкі. Як патлумачыў адзін з аксакалаў, некалькі дзесяцігоддзяў назад у калгасе столькі сіласу закладвалі б за месяц, а то і больш – «гудагайцы» справіліся ўсяго за дзень, і гэта толькі на МТК «Кярняны».
Дырэктар КСУП «Гудагай» завастрыў увагу на павецях для прафілакторных цялят, якія ўзведзены па ўласным праекце гаспадарчым спосабам. Садоўскі ўпэўнены, што пры такім утрыманні маладняку жывёла менш хварэе і відавочны эканамічны эфект: затраты на набыццё індывідуальных дамкоў былі б у некалькі разоў большымі за затраты на ўзвядзенне павецяў.
– Малочнае абсталяванне тут ужо зманціравана. Думаю, напачатку лістапада пачнём даіць кароў, – патлумачыў Эдуард Іванавіч. – Упэўнены, у наступным годзе МТК «Кярняны» будзе, як «Смілгі». Прапаную тады наведаць гэты комплекс – самы сучасны ў раёне.
Экскурсія па комплексе пачалася з цэха ўтрымання сухастойных кароў – дарэчы, яго праект распрацаваў Эдуард Садоўскі сумесна з камандай.
Галоўны ветурач Галіна Бабіч расказала, што ў першую гадзіну пасля нараджэння цяля з дапамогай дрэнчара выпойваецца малозівам. На працягу наступных 12-ці гадзін малое не чапаюць, яно адпачывае ў дамку са спецыяльным абагрэвам.
Галоўны заатэхнік Віктар Алёкса спыніўся на распрацоўцы рацыёна для розных груп жывёл:
– Сухастойныя каровы атрымліваюць сумесь з сіласу, здробненую салому і спецыяльную дабаўку. Каб 30 гадоў назад хтосьці пачуў, што так кормім жывёлу, – за галаву ўзяліся б, маўляў, што яны робяць. Аднак на практыцы пацверджана аптымальнасць такога харчавання.
Удзельнікі семінара пабывалі ў малочнадаільнай і камп’ютарнай залах і падзівіліся ўмовам для работы і адпачынку працаўнікоў.
– Загадчыца, відаць, у кабінеце не сядзіць! Папер на стале няма зусім, – заўважыў хтосьці з ветэранаў.
Начальнік комплексу Наталля Гурштын хутка знайшла што адказаць: уся інфармацыя пра жывёлу, надоі, ветэрынарныя маніпуляцыі цяпер у камп ’ютары.
Пакідаючы «Смілгі», многія з ветэранаў спынілі позірк на прыгожым мурале: маладая даярка з вядром у руках распачынае працоўны дзень.
У Палушах ветэраны пабывалі яшчэ на механічных майстэрнях і даведаліся, як дзейнічае цэх па перапрацоўцы рапсу. А завяршыўся насычаны на падзеі дзень святочным абедам у «гудагайскім» «Эдэме».
Матэрыялы старонкі падрыхтавала Алена ГАНУЛІЧ, фота аўтара.