Нечаканы падарунак
11 даматканых дываноў, вышытых ручнікоў з карункамі, абрусаў, узорыстых сурвэтак з Ваўкавыскага раёна папоўняць музей «Код памяці».
Іх перадала бібліятэкар Войткаўскай сельскай бібліятэкі Валянціна Нячай.
– На мінулым тыдні Валянціна Сяргееўна як адзін са слухачоў абласных курсаў павышэння кваліфікацыі ў Гродзенскім раёне наведала музей у Зарачанцы. А 24 лістапада патэлефанавала і расказала, што вырашыла падараваць нам сваю спадчыну, – падзялілася прыемнымі навінамі вядучы метадыст па рэалізацыі культурна-дзелавых праектаў і развіцці турызму Гродзенскага раённага культурна-інфармацыйнага цэнтра Наталля Рамановіч. – Матуля Валянціны Нячай Антаніна Карповіч нарадзілася ў 1934 годзе на Бераставіччыне, у вёсцы Паўлюшкі, доўгі час пражывала ў Біскупцах Ваўкавыскага раёна. Яна была звычайнай вясковай жанчынай, гадавалася ў простай сялянскай сям’і, многа гадоў працавала на будаўніцтве. А як толькі выдавалася вольная хвіліна, рукадзельнічала. На жаль, у 2016 годзе Антаніна Васільеўна сышла з жыцця. Зробленыя ёй цудоўныя рэчы цяпер можна ўбачыць у нашым музеі. Мы вельмі ўсцешаны гэтым і тым, што геаграфія яго экспанатаў паступова пашыраецца.