Яна ім ласкай матчынай
Працяг.
Пачатак на стар. 1.
Дзевяцікласнік са Слонімскага раёна Цімур Якаўчык упершыню прыняў удзел у абласным этапе рэспубліканскай алімпіяды па беларускай мове і літаратуры. Зацікавіўся гэтымі прадметамі не так даўно, але ўжо мае пэўныя поспехі ў іх вывучэнні. Цімура захапляе прыгажосць роднай мовы, менавіта гэты фактар стаў вырашальным пры выбары прадмета для больш глыбокага вывучэння.
– Беларуская мова прызнана адной з самых мілагучных у свеце пасля італьянскай. Менавіта на нашай роднай мове напісана шмат цудоўных твораў, розных вершаў. Таксама мяне цікавіць гісторыя развіцця беларускай мовы, і я буду працягваць паглыблена яе вывучаць, – расказаў удзельнік алімпіяды.
У гэтым годзе прадэманстраваць сваё веданне беларускай мовы і літаратуры пажадалі 68 вучняў з 14 раёнаў Гродзенскай вобласці. Дзевяцікласнікі прынялі ўдзел у алімпіядзе ўпершыню, таму, напэўна, больш хваляваліся. Сярод адзінаццацікласнікаў хапае юнакоў і дзяўчат, якія ўжо ўдзельнічалі ў мінулагодніх абласных этапах. Дарэчы, другі год запар алімпіяда па беларускай мове і літаратуры праводзіцца па новай сістэме: адмянілі вусныя адказы, і засталіся два іспыты – водгук на твор у першы дзень і комплексная работа з заданнямі па мове і літаратуры на другі.
Анастасія Ванеева са Смаргоні, як і Цімур Якаўчык, вучыцца ў 9 класе,
таму таксама пісала водгук на верш Уладзіміра Караткевіча «Калі пажар гуляе па страсе».
– Даволі цікавы твор, я не сустракала раней нічога падобнага. Зразумела яго не адразу, але, калі прачытала некалькі разоў, ён мне вельмі спадабаўся. Я лічу, што, на жаль, беларускай мове сёння ўдзяляецца недастаткова ўвагі, таму жадаю гэта выправіць. Як? У мяне ёсць некаторыя планы, але пакуль што гэта сакрэт, – падзялілася дзяўчына.
У гэтым годзе абласны этап алімпіяды па 18 прадметах распачаўся 11 студзеня. Беларуская мова і літаратура – першыя ў спіску, і гэта адзіны іспыт, які праводзіцца не ў Гродне, а на базе Скідзельскага прафесійнага сельскагаспадарчага ліцэя.
– Штогод у алімпіядзе па беларускай
Фота Мікалая Лапіна.
мове і літаратуры ўдзельнічаюць не менш за 60 навучэнцаў. Адбіраюцца яны рэйтынгава, і таму, зразумела, гэта наймацнейшыя прадстаўнікі. Многія з гэтых юнакоў і дзяўчат потым выбіраюць сваёй прафесіяй філалагічны накірунак, нават калі не беларускую мову, то, напрыклад, журналістыку, – распавяла старшыня прадметнага аргкамітэта, метадыст Гродзенскага абласнога інстытута развіцця адукацыі Святлана Гузава.
Ужо 14 студзеня журы алімпіяды – а гэта настаўнікі вобласці і выкладчыкі філалагічнага факультэта Купалаўскага ўніверсітэта – абвесціць вынікі. 15 лепшых навучэнцаў будуць прадстаўляць Гродзенскую вобласць на рэспубліканскім этапе алімпіяды па беларускай мове і літаратуры.