Навучыць рамёствам моладзь

У Віцебскім абласным метадычным цэнтры народнай творчасці адбылося адкрыццё выставы-конкурсу дэкаратыўнапрыкладнога мастацтва «Ад майстра да вучня».

У экспазіцыі прадстаўлены калекцыі работ па розных відах рамёстваў: саломапляценнi, кераміцы, ганчарству, маляванцы, разьбе па дрэве, пэчворку (лапікавым шыццi) і іншых напрамках, у якіх працуюць майстры Віцебшчыны і іх вучні.

Падчас адкрыцця выставы госці змаглі пазнаёміцца з народнымі ўмельцамі, а таксама ўзяць удзел у майстар-класах. Цікава прайшлі ўрокі сябра заслужанага аматарскага калектыву Рэспублікі Беларусь клуба народных майстроў і мастакоў «Скарбонка» Лепельскага Дома рамёстваў Івана Будзіча, які выкарыстоўвае розныя віды разьбы, народнага майстра Беларусі Тэрэсы Худзяковай, што валодае вялікай колькасцю прыёмаў саломапляцення і карыстаецца мноствам аўтарскіх. Свае методыкі рамёстваў прад- ставілі таксама Нато Беліходзэ (ткацтва), Алена Калуханава (гліняная цацка) і Жанна Комлева (кераміка) з Віцебска. Дарэчы, майстар-класы ад удзельнікаў праекта будуць праходзіць у ВАМЦНТ кожны тыдзень.

Работу майстроў і іх вучняў будзе ацэньваць абласное журы, па выніках конкурсу вызначаць пераможцаў у шасці намінацыях, а таксама Гран-пры.

Як адзначыла кандыдат мастацтвазнаўства вядучы метадыст ВАМЦНТ Людміла Вакар, абласны праект «Ад майстра да вучня» павінен прадэманстраваць вынікі шматгадовай працы па навучанні дзяцей і моладзі традыцыйным тэхналогіям і рамёствам Віцебшчыны.

Арганізатарамі праекта выступілі галоўнае ўпраўленне ідэалагічнай работы, культуры і па справах моладзі аблвыканкама і ВАМЦНТ. Выстава працягне работу да 11 лістапада.